Ձեր վստահելի աղբյուրը

Այսօր Շենգավիթ վարչական շրջանների ընդհանուր իրավասության դատարանում ծննդկան Մերի Մարգարյանի մահվան գործով դատական նիստում «Էրեբունի» բժշկական կենտրոնի ծննդօգնության գծով փոխտնօրեն Անդրանիկ Պողոսյանը հայտարարեց, որ Մերիին պետք էր կեսարյան հատում կատարել դեռ հուլիսի 23-ին, այլ ոչ թե թողել նրա մոտ առաջանան բարդություններ ու վիրահատել միայն հուլիսի 27-ին:

Հիշեցնենք՝ հուլիսի 27-ին ժամը 15:00-ի սահմաններում «Էրեբունի» բժշկական կենտրոն տեղափոխված Մերի Մարգարյանը մահացել էր 2015-ի հուլիսի 29-ին` հուլիսի 27-ին կատարված կեսարյան հատումից հետո: Նրա մոտ ախտորոշվել էր «ՀԵԼԼՓ/HELLP» սինդրոմ (մանկաբարձության մեջ հազվադեպ հանդիպող բարդություն) համախտանիշի թոքաբորբ: Հուլիսի 30-ին էլ մահացել էր նաև նրա նորածին դուստրը:

Բայց Մերի Մարգարյանը դեռ հուլիսի 23-ից գանգատներ է ունեցել, բարձր է եղել նրա ջերմությունը և դիմել է իրեն հսկող բժիշկ Շուշանիկ Բախշյանին: Այս գործով ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերիին ոչ պատշաճ բուժօգնություն ցուցաբերելու համար (ՀՀ Քրեական օրենսգրքի 130 հոդված)։

«Երբ նա ընդունվեց «Էրեբունի» բժշկական կենտրոն և երբ ես առաջին անգամ տեսա, ինքը պատգարակի վրա էր, շնչահեղձ վիճակում էր, հարցերին պատասխանում էր դժվարացումով ու զգացվուիմ էր, որ նրա մոտ ինտոքսիկացիա է գնում, և ես անմիջապես սկսեցի հետազոտել հղիությունը, անմիջապես որոշեցինք կեսարյան հատումով ավարտել հղիությունը», -դատարանում տված ցուցմունքում հայտարարեց Անդրանիկ Պողոսովիչը:

Նա ընդգծեց, որ «Էրեբունի» բկ-ում ախտորոշման արդյունքները ցույց են տվել, որ Մերի Մարգարյանի մոտ ծանր պրեկլամսիայի ֆոնին զարգացել է ՀԵԼԼՓ սինդրոմ:

Դատախազը հետաքրքրվեց, թե կեսարյան հատման անհրաժեշտությունը ինչո՞վ է պայմանավորել բժիշկը, ի պատասխան Պողոսյանն ասաց, թե քանի որ հիվանդի մոտ ախտորոշվել է ՀԵԼԼՓ սինդրոմ և պտղի ներարգանդային խիստ տուժվածություն, ապա պետք էր մոր և մանկան կյանքը փրկելու համար կատարել կեսարյան հատում:

«ՀԵԼԼՓ սինդրոմի ախտորոշման դեպքում պետք է պտուղը հանվի, որպեսզի մայրը սկսի լավանալը և դրա միակ բուժումը ծննդալուծումն է», -նշեց Պողոսյանը:

Մյուս հարցին, թե հաշվի առնելով հիվանդի վիճակը, ե՞րբ պետք էր կեսարյան հատում կատարել, անդրանիկ Պողոսյանը պատասխանեց. «Հուլիսի 23-ից սկսած Մերի Մարգարյանի մոտ կարելի էր կեսարյան հատումը կատարել, քանի որ պտղի մոտ եղել է սակավաջրություն, այսինքն՝ պտղաջրերի մակարդակը զրոյական է, ու երեխայի տուժվածություն: ՀԵԼԼՓ սինդրոմի միակ բուժումը ծննդալուծումն է»:

Նկատենք, որ «Շենգավիթ» բժշկական կենտրոնի մասնագետ-բժիշկները դատարանում իրենց ցուցմունքներում նշել էին, որ իրենք չեն դմել կեսարյան հատման միջոցին, քանի որ դրա համար բժշկական ցուցում չեն ունեցել:

Ներկայացնելով ՀԵԼԼՓ սինդրոմը, բժիշկն ասաց, թե դա այն է, երբ արյան կարմիր գնդիկներն են հեմոդիալիզի ենթարկվում և դրա առկայության պարագայում հիվանդի մոտ լյարդի ֆերմենտներն են բարձրանում և տրոմբոցիտների քանակն է նվազում:

Օրինակ՝ Մերիի մոտ, նրա խոսքով, լյարդի ֆերմենտները 10 անգամ բարձր են եղել, իսկ տրոմբոցիտների քանակը՝ 29 հազար, ինչը «կատաստրոֆիկ ցածր թիվ է»: Ինչ վերաբերում է պրեկլամսիա հիվանդությանը, ապա Պողոսյանի խոսքով, պտղի ներարգանդային աճի դանդաղեցման պատճառներից մեկը պրեկլամսիա հիվանդությունն է: Բժիշկն ասաց, որ իր 37-ամյա գործունեության ընթացքում և պրեկլամսիայով, և ՀԵԼԼՓ սինդրոմով հղիների հիվանդացության դեպքեր շատ են եղել, և դա հնարավոր է բուժել:

Անդրանիկ Պողոսյանն իր ցուցմունքում սխալ համարեց նաև «Շենգավիթ» բժշկական կենտրոնի մանկաբարձության բաժանմունքի մասնագետների ախտորոշումը, թե Մերի Մարգարյանի մոտ սուբարախրոնիդալ արյունազեղում կամ ինսուլտ է:

«Մեր ռեանիմատոլոգները և նևրոպաթոլոգները, որոնք սուբարախրոնիդալ արյունահոսությամբ ու արյունազեղումներով են զբաղվում, նայել են միասին ու չեն հայտնաբերել նման ախտորոշում: Իրենք (նկատի ունի «Շենգավիթ» բկ-ն) ճիշտ է, գրել էին, թե կա արյան զեղում և պետք է տոմոգրաֆիա անցկացնել, բայց այդպես չարվեց: Չարվեց նաև այն պատճառով, քանի որ նրա ընդհանուր ֆիզիկական վիճակն էր հակացուցում տոմոգրաֆիա անցնելուն», -հայտարարեց Պողոսյանը՝ ընդգծելով, որ «Շենգավիթ» ԲԿ-ից Մերի Մարգարյանի հետ ուղարկված հիվանդության պատմության մեջ չի նշվել հղիության վիճակի և պտղի մասին:

Բացի այդ, Պողոսյանն ասաց, որ Մերիի մոտ եղել է երկկողմանի թոքաբորբ, որը իրենց ցուցմունքներում բացառել էին «Շենգավիթ» բկ-ի բժիշկները: «Մեր մոտ հետազոտության ժամանակ երկկողմանի թոքաբորբ արձանագրվել է, թե երբ է եղել, չեմ կարող ասել», -նկատեց Պողոսովիչը:

Ավելին, նա ակնարկեց, որ «Շենգավիթ» բկ-ն թերացել է իր գործում, քանի որ «Էրեբունի» բկ տեղափոխվելիս ներկայացված հիվանդության պատմության փաստաթղթում չի նշվել հղիի ու պտղի առողջական վիճակի մասին, մինչդեռ դա անհրաժեշտություն է և անգամ «ավտոկատաստրոֆայի դեպքում» նման նշում կատարվում է:

Ամբաստանյալ Անի Բաբելյանը վկայից հետաքրքրվեց, թե եթե հուլիսի 27-ին ժամը 15:15-ին հիվանդը ընդունվել է «Էրեբունի» ԲԿ, ապա ինչո՞ւ են հետազոտությունները կատարվել 16:00-ին, ինչո՞ւ մանկաբարձ գինեկոլոգները առաջին բուժօգնությունը չեն ցուցաբերել, չեն չափել արյան ճնշումը և այլն:

«Որովհետև հիվանդը, հղին բերվել է որպես ծանր պաթոլոգիկ հիվանդ, իսկ նման դեպքերում առաջինը նրան զննում են նեղ մասնագետները: Մերի Մարգարյանի համար Սիրունյանը զանգել է ինձ առավոտյան, բայց հիվանդը տեղափոխվել է ժամը երեքի կողմերը: Ավելին ասեմ ձեզ, երբ օրինակ, մարզերից նման պաթոլոգիաներով հղիներ են գալիս, ապա նրանց հսկող բժիշկը նրանց հետ միասին է գալիս, որ մանրամասն ներկայացնի հղիի վիճակը: Այս դեպքում Մերի Մարգարյանին չեն ուղեկցել», -Բաբելյանի հարցին ի պատասխան, ասաց Պողոսյանը:

Այսպիսով, վկա բժիշկների հարցաքննությունն ավարտվեց: Այս գործով հաջորդ դատական նիստում, որը կկայանա ուղիղ մեկ շաբաթ հետո, կհարցաքննվեն փորձագետները: