Ձեր վստահելի աղբյուրը

«Կարմիր Խաչի միջազգային կոմիտեն Հայաստանի ու Ադրբեջանի հետ գաղտնի երկխոսություն է վարում»,-Panorama.am-ին ասաց  կոմիտեի հայաստանյան պատվիրակության լրատվական բաժնի աշխատակից Հասմիկ Գալստյանը:

Նա նշեց, որ կողմերի միջև համաձայնության ձեռք բերելու պարագայում կոմիտեն պատրաստ է որպես չեզոք միջնորդ ներկա գտնվել սպանված ադրբեջանցի զինծառայողի մարմնի հանձնման  գործընթացին:

«Այս պահին միայն այսքանը կարող եմ ասել, բանակցություններն ու վարվող երկխոսությունը գաղտնի են, դրանց բովանդակությունը չենք կարող հրապարակել: Այս պահին մենք պատրաստակամ սպասում ենք համաձայնության կայացմանը, որպեսզի որպես միջնորդ մեր դերը կատարենք»,-ասաց նա:

Հիշեցնենք,  որ ԵԱՀԿ Մինսկի խմբի համանախագահները կոչ են արել հայկական կողմին վերադարձնել ադրբեջանցի զինծառայողի մարմինը: 2016-ի դեկտեմբերի 29-ին ՀՀ Տավուշի մարզի՝ Չինարի գյուղից դեպի հարավ-արևելք ընկած պետական սահմանի հատվածում, ադրբեջանական զորքերը ձեռնարկել են դիվերսիոն ներթափանցման փորձ:

ՀՀ ՊՆ-ից հայտնել էին,  որ մարտական հենակետերից մեկի մոտ հայտնաբերվել է ադրբեջանական ԶՈՒ համազգեստով մահացու վիրավորումներ ստացած անձի դի, որի ինքնությունը պարզելու ուղղությամբ կատարվում են համապատասխան գործողություններ:

Ադրբեջանը շարքային Գուրբան Չինգիզ Սալմանին ներկայացնում է որպես անհետ կորած:

ՀՀ ՊՆ-ն մի քանի անգամ պաշտոնապես հայտարարել է,  որ Հայաստանի Զինված ուժերի տրամադրության տակ առկա են անհերքելի ապացույցներ՝ ադրբեջանական կողմի նախահարձակ լինելու վերաբերյալ: