Ձեր վստահելի աղբյուրը

Բնապահպան Կարինե Դանիելյանը քաղաքապետարանի՝ էկոլոգիապես մաքուր տրանսպորտային միջոց համարվող էլեկտրամոբիլների սեփականատերերին արտոնություն տրամադրելու վերաբերյալ մտադրությունը դրական առաջին քայլն է համարում, որին պետք է հետևեն նաև այլ քայլեր:

«Մեր հիմնական խնդիրը, կարծում եմ, մնում է քաղաքաշինությունը, քաղաքի՝ հատկապես Կենտրոնի խտացումը, որը բերում է տրանսպորտային միջոցների թվի ավելացման, դա էլ իր հերթին բերում է ավելի շատ խցանումների, որոնց ժամանակ էլ տեղի են ունենում լրացուցիչ արտանետումներ»,-Panorama.am-ի հետ զրույցում ասաց Կարինե Դանիելյանը:

Բնապահպանը հասկանում է՝ հնարավոր չէ քանդել արդեն կառուցած հսկա շենքերը, բայց գոնե պետք է այս պահին կանգնեցնել գործընթացը:

Երևանը դեպի  կանաչ քաղաքներ համաշխարհային ցանցին է միացել, ինչը նշանակում է, որ քաղաքային  իշխանությունները պարտավորություններ են ստանձնել այն կանաչ, խելացի քաղաք դարձնելու համար: Կ. Դանիելյանին զարմացրել է Տալինի քաղաքապետի նախաձեռնությունը՝ հասարակական տրանսպորտն անվճար է դարձրել, ինչի շնորհիվ շատ մարդիկ սեփական մեքենայով աշխատանքի գնալու փոխարեն նախընտրում են օգտվել հասարակական տրանսպորտից:

«Իհարկե, մենք այս առումով լուրջ խնդիրներ ունենք, օրինակ Մետրոպոլիտենի ցանցի ընդլայնումը, որը շատ ծախսատար է, բայց խիստ անհրաժեշտ,  տրոլեյբուսի պարկի համալրումը: Մենք ամեն ինչ հակառակն ենք անում: Մոսկվայի հետևից գնացինք, տրամվայից հրաժարվեցինք, բայց Մոսկվան հիմա իր սխալները շտկում է»,-ասաց բնապահպանը:

Դատելով մայրաքաղաքի փողոցների՝ օր օրի ավելացող ծանրաբեռնվածությունից, դժվար է ասել, երբևէ երևանցիները էլեկտրական այդ տրանսպորտից օգտվելու հնարավորություն կունենա՞ն, թե՞ ոչ:

«Տրամվայի վերադարձն էլ է շատ ծախսատար: Այն ժամանակ որոշ մարդիկ օգտվեցին տրամվայի գծերի մետաղը վաճառելուց: Խայտառակ երևույթ էր: Ինչքան բողոքեցինք, բայց օգուտ չեղավ: Կարծում եմ, որ Հայաստանում ամենամեծ ռիսկը կոռուպցիան է, մարդիկ տեսնում են մի բան կարելի է փախցնել, ինչ գնով լինի, անում են: Եվ դա շարունակվում է»,-ասաց նա:

Բնապահպանը միաժամանակ նշեց, որ Երևանում լավ միտումներ է տեսնում, կանաչ տարածքներն են ավելացել, քաղաքը ծաղկապատվում է, բայց անցած տարիներին արված սխալները շտկելը դեռ երկար ժամանակ կպահանջի:

Երևանի բարձրահարկ շինությունների ավելացումը քննադատող բնապահպանին հաճախ են մատնացույց անում Նյու Յորքի երկնաքերերը, սակայն փորձագետը հիշեցնում է, որ ամերիկյան այդ քաղաքը նախ գտնվում է օվկիանոսի ափին, այնտեղից փչող քամիները հաճախ են մաքրում օդը, չնայած դրան, Նյու Յորքը համարվում է աշխարհի աղտոտված քաղաքներից մեկը:

«Ցավոք, մեր քաղաքաշինության մեջ վերցվում են վատագույն օրինակները: Սակայն Երևանը գոգավարության մեջ է, տեսեք, քանի օր  է մառախուղն ու սառն օդը լճացել են, դա էլ վտանգավոր է, մառախուղն իր մեջ հավաքում է աղտոտող նյութերը: Հիմա տեսնում ենք՝ Չինաստանի քաղաքներում ինչ է կատարվում, Պեկինում մարդիկ փողոց են դուրս գալիս դիմակներով: Աստված չանի,  մենք դրան հասնենք»,-մտահոգությունները բարձրաձայնեց փորձագետը:

Նա որպես դրական օրինակ նշեց Սկանդինավյան երկրների քաղաքները, որտեղ էկոլոգիական սկզբունքը միշտ դրվել է ամենատարբեր զարգացումների հիմքում:

Նշենք, որ Երևանի քաղաքապետարանում երեկ տեղի ունեցած խորհրդակցության ժամանակ անդրադարձ է կատարվել էկոլոգիապես մաքուր տրանսպորտային միջոց համարվող էլեկտրամոբիլների սեփականատերերին արտոնություն տրամադրելու հարցին: Հիշեցնելով, որ Երևանի ավագանու վերջին նիստում հարց էր բարձրացվել տրանսպորտային այդ միջոցների ներկրումը խրախուսելու նպատակով որոշակի արտոնություն սահմանել դրանց սեփականատերերի համար, քաղաքապետ Տարոն Մարգարյանը համապատասխան ստորաբաժանումներին հանձնարարել է մշակել և Երևանի  ավագանու առաջիկա նիստի հաստատմանը ներկայացնել մայրաքաղաքի վճարովի ավտոկայանատեղերում էլեկտրամոբիլների կայանման համար վճար չգանձելու մասին որոշման նախագիծ:

Տնտեսագետ Մեսրոպ Առաքելյանը, ով հետևողականորեն բարձրաձայնում է մայրաքաղաքի խնդիրների մասին,  նման նախաձեռնությունը լուրջ չի համարում մի քանի պատճառներով: Նախ,  էլեկտրամոբիլը բավականին թանկ հաճույք է, Հայաստանում նման մեքենա ունի մի քանի մարդ, իսկ էկոլոգիապես մաքուր տրանսպորտի մասայականացման համար ավելի լուրջ քայլեր են անհրաժեշտ, օրինակ՝ էլեկտամոբիլների ներմուծման համար կառավարությունը կարող է որոշ արտոնություն նախաձեռնել` ԱԱՀ ազատում, էժան վարկերի տրամադրում:

«Ակնհայտ ոչ ադեկվատ հիմնավորում է:  Չի կարող 12. 000 դրամ տարեկան խնայողությունը նպաստել  50.000 դոլարանոց մեքենայի ներմուծմանը»,-Panorama.am-ի հետ զրույցում ասաց Մեսրոպ Առաքելյանը:

Նա հիշեցրեց, որ  նման մեքենաների համար հարևան Վրաստանի մայրաքաղաքում անվճար լիցքավորման կայաններ են տեղադրել, սակայն  նման բան կարելի է անել, երբ կա որոշակի պահանջարկ:

«Հայաստանում նման մեքենաները կարծեմ՝ 2-3 հատ են: Այս պահին դրանով զբաղվելը ուղղակի ցույց է տալիս հերթական ոչ արդյունավետ աշխատանքը»,-կարծիք հայտնեց նա:

Քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը Paorama.am-ին հայտնեց, որ այս պահին չունեն տվյալներ, թե քանի նման մեքենա կա Երևանում:

«Դեռ  չունենք տվյալներ:  Քաղաքապետի հանձնարարականի տրամաբանության մեջ է նաև ճշտել այդ տվյալը,  որպեսզի ավագանու որոշումը ներկայացնելիս այն լինի լիարժեք»,-ասաց քաղաքապետարանի ներկայացուցիչը: