Դավութօղլուն ՝ իր և Գյուլենի հանդիպման, խոցված ռուսական ինքաթիռի և դրա վերաբերյալ իր հրամանի մասին

Քաղաքական 17:53 12/01/2017

Դավութօղլուն ՝ իր և Գյուլենի հանդիպման, խոցված ռուսական ինքաթիռի և դրա վերաբերյալ իր հրամանի մասին

Թուրքիայի նախկին վարչապետ Ա. Դավութօղլուն հեղաշրջման փորձի գործը հետաքննող խորհրդարանական հանձնաժողովին ուղարկած գրավոր տեքստով մի շարք պարզաբանումներ է տվել հանձնաժողովի կողմից ներկայացված հարցերի վերաբերյալ: Այս մասին գրել է «Հուրիյեթը»:

Ըստ աղբյուրի, նա անդրադարձել է 2013թ. Ֆեթուլլահ Գյուլենի հետ իր հանդիպմանը` նշելով, որ այդ հանդիպումը տեղի է ունեցել ՄԱԿ կատարած այցի ընթացքում`վարչապետ Էրդողանի գիտությամբ ու հանձնարարությամբ և հանդիպման արդյունքների վերաբերյալ զեկուցվել է վերջինիս:

Ա. Դավութօղլուն պարզաբանումներ է ներկայացրել 2015 թ. նոյեմբերին ռուսական ռազմական ինքնաթիռի խոցման հետ կապված ԱԶԿ խորհրդարանական խմբակցության նիստին արված իր այն հայտարարության վերաբերյալ, որ «խոցման հրամանն անձամբ ինքն է տվել»:

Նա նշել է, որ երկրի սահմանների պաշտպանության վերաբերյալ իր տված հրամանը չի վերաբերել կոնկրետ դեպքին, կոնկրետ ռուսական ինքնաթիռին, քանի որ րոպեների ընթացքում հնարավոր չէ նման հրաման արձակել: Հրամանը վերաբերել է թուրքական սահմանների անխախտելիությանն ու պաշտպանությանը և այդ համատեքստում զինվորականների իրականացվելիք պատասխանատվություններին ու պարտականություններին:

Վերջինս հերքել է այն հայտարարություններն ու տեղեկությունները, որ ռուսական ինքնաթիռը խոցած թուրք օդաչուն կապեր է ունեցել Ֆ. Գյուլենի հետ կամ հանդիսացել է գյուլենական: Քանի որ ուսումնասիրվել է օդաչուի անցյալն ու նրա կապերը և հստակ որևէ առնչություն, որևէ կապ չի բացահայտվել:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: