Ձեր վստահելի աղբյուրը

Այսօր այս տարվա առաջին ասուլիսում Լեռնային Ղարաբաղի հակամարտության հարցի լուծման տարբերակների վերաբերյալ հարցին վարչապետ Կարեն Կարապետյանը պատասխանեց որպես ծագումով ղարաբաղցի. «Ես խաղաղության դիմաց զիջումների կողմնակիցը չեմ»:

Այնուհետև հավելեց. «Ես վստահ եմ, որ մենք ունենք տարբերակ, երբ մեր ինքնասիրությունը, մեր անվտանգությունը, մեր հաղթանակը մենք կարող ենք պաշտպանել, պահել համապատասխան տրամաբանական բանակցությունների արդյունքում»:

Կարապետյանի խոսքով, այս պահին անտրամանաբանական է խոսել բանակցությունների սցենարի մասին:

Լրագրողի դիտարկմանը, թե զիջման տարբերակն է այժմ բանակցությունների սեղանին, վարչապետը արձագանքեց. «Նայած՝ ինչն ենք փոխզիջում: Եկեք՝ երբ գա պահը...փոխզիջումը ոչ միայն տարածքն է, փոխզիջումը կարգավիճակ է, փոխզիջումը տարբեր բաներ են:

Ես չեմ կարծում, որ որևիցե մեկը Հայաստանի Հանրապետությունում որոշում կայացնող լինի ու իր վրա այդ պատասխանատվությունը լինի, կկայացնի մի որոշում, որի հետ մեր ազգը, մեր քաղաքացիները համաձայն չեն լինի: Դա այնպիսի մեծ պատասխանատվություն է, որ ես չեմ տեսնում այդ մարդուն, որ նա կարող է իր նորմերը խախտի ու գնա նման բան որոշի: Այդ իսկ պատճառով չեմ կարծում, որ մենք այդ հարցում շատ անհանգստանալու խնդիր ունենք»: