Ձեր վստահելի աղբյուրը

Առողջապահության նախարարությունը հաղորդագրություն է տարածել, որտեղ խորհուրդ է տալիս հետտոնական իրարանցումից հետո չմոռանալ առողջ կենսակերպի մասին:

«Տոնական տարատեսակ խորտիկների չարաշահումից, արձակուրդների պատճառով տանը երկար մնալուց հետո մենք ոչ միայն ավելացնում է քաշը, այլև մի շարք հիվանդագին վիճակների զարգացման համար ռիսկեր նախապատրաստում: Պասիվ կենսակերպը դանդաղեցնում է նյութափոխանակությունը, դժվարանում է մարսողությունը, օգտակար վիտամինների և հանքանյութերի յուրացումը,  ի հայտ է գալիս աննախադեպ հոգնածություն, տրամադրության և աշխատունակության անկում»,-նշում են նախարարությունից:

Մասնագետները խորհուրդ են տալիս, անկախ եղանակային պայմաններից, վերանայել կենսակերպը՝ կանխելու հիվանդացությունը, վերականգնելու և սահմանելու առողջ կենսակերպ:

Այսպես`

• առավոտյան աշխատանքի կամ դասի գնալիս առաջարկվում է 10-15 րոպե քայլել,
• բարձրանալ աստիճաններով՝ վերելակից օգտվելու փոխարեն,
• գրասենյակում հաճախ քայլել, յուրաքանչյուր 2 ժամը մեկ անգամ վեր կենալ՝ հատկապես, եթե նստակյաց աշխատանքի եք,
• ժամանակն է նախընտրել տաք ապուրները՝ ընդեղենով տաք ուտեստները ոչ միայն հաճելի են ձմռանը, այլև քիչ կալորիականություն ունեն,
• պետք է հաճախ օգտագործել չրեղեն և դրանցից պատրաստված տաք կոմպոտներ,
• վաղ առավոտյան և երեկոյան օդափոխել մշտական գտնվելու վայրերը՝ աշխատասենյակներն ու բնակարանը, չէ՞ որ դանդաղած նյութափոխանակությունը հնարավորություն է ստեղծում հատկապես օդակաթիլային հիվանդությունների զարգացման համար: