Ձեր վստահելի աղբյուրը

«Քաղաքացիական պայմանագիր», «Լուսավոր Հայաստան» և «Հանրապետություն» կուսակցությունների կողմից ձևավորած «Ելք» դաշինքը, ինչպես նաև տարբեր քաղաքական ուժեր Գյումրիում ստեղծված ԳԱԼԱ՝  «Գաղափարակից լիբերալների ալյանս» կուսակցությանը առաջարկել են միասին մասնակցել ապրիլի 2-ին կայանալիք խորհրդարանական ընտրություններին, բայց ԳԱԼԱ-ում դեռ քննարկումներ են:

«Դեռևս ոչ մի նորություն: Նախ դեռևս ԳԱԼԱ-ն հստակ որոշում չունի՝ մասնակցելո՞ւ է խորհրդարանական ընտրություններին, թե՞ ոչ: Երբ կուսակցությունը կկայացնի վերջնական որոշում, կհստակեցնենք նաև մասնակցության ձևաչափը՝ միայնա՞կ ենք մասնակցելու, թե՞ որևէ քաղաքական ուժի կամ ուժերի հետ ենք մասնակցելու գործընթացին», -Panorama.am-ի թղթակցի հետ զրույցում ասաց ԳԱԼԱ կուսակցության անդամ Արմենուհի Վարդանյանը:

Նա պատասխանել է նաև մեր միա քանի հարցերին

-Ի՞նչն է տատանվելու պատճառը մասնակցել-չմասնակցելու հարցում:
-Պատճառները տարբեր են:  Փորձում ենք գնահատել, հասկանալ հնարավորությունները, ունեցած ռեսուրսը, մասնակցության նպատակահարմարությունը՝ ձեռքի տակ ունենալով նաև ՏԻՄ ընտրությունների արդյունքները: Կուսակցության վարչության կազմում այս պահին էլ քննարկումները շարունակվում են և դեռևս ընդհանուր հայտարարի չենք եկել: Երկրորդական հարց է մասնակցության ձևաչափը, երբ դեռ չկա վերջնական որոշում՝ ԳԱԼԱ կուսակցության մասնակցության վերաբերյալ: Երբ կլինի կուսակցության վարչության որոշում, որ մեր թիմը պատրաստ է մասնակցել ապրիլի 2-ին կայանալիք խորհրդարանական ընտրություններին, առաջ կգա մյուս հարցը՝ ինչպես, ինչ ձևաչափով: Անկեղծ ասեմ, որ վարչության ներսում կարծիքները տարբեր են և դեռևս ընդհանուր հայտարարի չենք եկել:

-Այսինքն՝ տարաձայնություններ կա՞ն կուսակցությունում այդ հարցի շուրջ:
-Ես կասեի պարզապես ներկուսակցականակտիվ քննարկումներ, թե պե՞տք է, որ ԳԱԼԱ կուսակցությունը մասնակցի առաջիկա ընտրություններին, թե՞ ոչ: Այս հարցում դեռևս վերջնական որոշման չենք հանգել: Խոսել որևէ քաղաքական ուժի հետ համագործակցության մասին վաղ եմ համարում, որովհետև դեռևս առաջին քայլն արված չէ: Միայն վերջնական որոշումից հետո տեղին կլինի խոսել՝ ո՞ր քաղաքական ուժերի հետ է հնարավոր ԳԱԼԱ-ի մասնակցությունը խորհրդարանական ընտրություններին:

-Իսկ հնարավո՞ր է տարբերակ երբ  «Ելք» դաշինքի հետ ձեր թեկնածուն ունենաք  Շիրակի մարզի տարածաշրջանում, որտեղ դուք առավել ակտիվ եք:
-Հիմա վաղ է նաև այդ հարցին պատասխանել, եթե չենք որոշել՝ մասնակցել, թե ոչ, հիմա չեմ կարող ասել, մասնակցության ձևաչափը: Ռեալ դեռևս չկա վերջնական որոշում:

-Իսկ ե՞րբ կարելի է սպասել որոշման՝ հաշվի առնելով, որ առաջադրումներին մեկ ամսից էլ քիչ ժամանակ է մնացել:
-Չեմ կարծում, որ շատ երկար կձգվեն քննարկումները, որովհետեւ իսկապես քիչ ժամանակ կա: