Ձեր վստահելի աղբյուրը

Դեկտեմբերի 23-ից մինչև 2017 թվականի հունվարի 8-ը հանրապետության ողջ տարածքում շրջայցեր են իրականացվել 816 տնտեսավարող սուբյեկտների մոտ: ՍԱՊԾ-ն այսօր  ամփոփել է  դրանց արդյունքները:

Երևան քաղաքում և հանրապետության բոլոր մարզերում ձևավորել են աշխատանքային խմբեր, որոնք 2016 թվականի դեկտեմբերի 23-ից մինչև 2017 թվականի հունվարի 8-ը ներառյալ առևտրի կենտրոններում, պարենային ապրանքի խանութներում (ընտրանքային կարգով) և մսի վաճառքի կետերում  իրականացվել են հսկողական շրջայցեր:

Խստացված վերահսկողության շրջանակներում ուսումնասիրվել են տնտեսավարող սուբյեկտների կողմից իրացվող սննդամթերքի (հատկապես արագ փչացող սննդամթերքի) պիտանիության ժամկետին և պահման պայմաններին, իրացվող մսի և մսեղիքի պահման պայմաններին և հիգիենային ներկայացվող պահանջներին համապատասխանության փաստը:

«580 տնտեսվարող սուբյեկտի մոտ արձանագրվել են անհամապատասխանություններ, մասնավորապես՝ առանց սահմանված կարգի մակնշման սննդամթերքի իրացման դեպքեր, պահման պայմանների անհամապատասխանություններ, մսի իրացման որոշ կետերում՝ առանց անասնաբուժասանիտարական փորձաքննության մսեղիքի իրացման դեպքեր: Հայտնաբերված  բոլոր անհամապատասխանութունների դեպքում իրացվող սննդամթերքը, միսը կամ մսեղիքը հանվել է շրջանառությունից և, նման խախտումները բացառելու համար, տրվել են անհրաժեշտ ցուցումներ»,-հայտնում են ծառայությունից:

Ավելի վաղ ծառայությունից հայտնել էին, որ  նախատոնական և հետտոնական օրերին ՀՀ ԳՆ սննդամթերքի անվտանգության պետական ծառայությունը կխստացնի վերահսկողությունը, մասնավորապես՝ 2016 թվականի դեկտեմբերի 23-ից մինչև 2017 թվականի հունվարի 8-ը առևտրի կենտրոններում և ընտրանքային կարգով` պարենային ապրանքների խանութներում կիրանացվեն հսկողական շրջայցեր:

«Անհամապատասխանութան դեպքում՝ տվյալ տնտեսավարող սուբյեկտի ղեկավարի կամ պատասխանատու անձի միջոցով՝ պիտանիության ժամկետն անցած կամ չհամապատասխանող պայմաններում իրացվող սննդամթերքն անմիջապես կհանվի շրջանառությունից և կոչնչացվի»,-նշել էին ծառայությունից:

Այսօր տարածած հաղորդագրության մեջ ոչնչացման մասին տեղեկատվություն չկա: