Ձեր վստահելի աղբյուրը

Քաղաքական և ընտրական տեխնոլոգիաների փորձագետ Արմեն Բադալյանը խորհրդարանական ընտրություններից մի քանի ամիս առաջ վերլուծել է քաղաքական դաշտում իրավիճակը և եզրակացրել.

«Կուսակցությունները ամեն կերպ խնդիր են լուծում մտնել խորհրդարան, որովհետև չմտնողը կարող է չգոյատևի: Դրա համար հիմնական խնդիրը դրված է ամեն կերպ խցկվել խորհրդարան և ոչ թե իշխանափոխություն կատարել: Իշխանափոխության մասին մոռացեք»:

Panorama.am-ի թղթակցի հետ զրույցում պարոն Բադալյանը նկատեց, որ քաղաքական ուժերը վերջին տարիներին հնարավորություն ունեին գաղափարա-քաղաքական այլընտրանք հանդիսանալ Հանրապետական կուսակցությանը, սակայն բաց են թողել ժամանակը:

Առայժմ հայտնի է միայն, որ խորհրդարանական ընտրություններին միայնակ է մասնակցելու իշխող Հանրապետական կուսակցությունը, իսկ մյուս քաղաքական ուժերը դեռ բանակցությունների մեջ են: Վերջնական է միայն «Քաղաքացիական պայմանագիր», «Լուսավոր Հայաստան» և «Հանրապետություն» կուսակցությունների կողմից «Ելք» դաշինքը ձևավորելու մասին:

«Տպավորություն կա, որ քանի որ քիչ ժամանակ է մնացել, այդ ուժերը ընդամենը մարդաքանակ լրացնելու խնդիր են լուծում և ոչ թե ընտրությունների բովանդակային մասին են ուշադրություն դարձնում», -նկատեց մեր զրուցակիցը: Այս ամենը, երբ տեղի է ունենում ռեսուսների փնտրտուք, ըստ Բադալյանի, նախորդ տարիներին անգործության հետևանքն է:

Մինչ բոլորը ռեսուրսների փնտրտուքի մեջ են, քաղաքական փորձագետի խոսքով, երկու քաղաքական ուժ արդեն անուղղակի քարոզարշավ է սկսել՝ մեկը Հանրապետական կուսակցությունն է, մյուսը՝ Հայ Ազգային կոնգրես կուսակցությունը:

«ՀՀԿ-ի անուղղակի քարոզարշավը սկսեց, երբ վարչապետ փոխվեց, երբ կառավարությունում որոշ օդիոզ դեմքեր փոխվեցին, որոշ մարզպետներ պաշտոնանկ արվեցին, վարչապետի գլխավորությամբ որոշ գործողություններ կատարվեցին, սա Հանրապետական կուսակցության անուղղակի քարոզարշավն է, որն արդեն ընթանում է: Եվ երկրորդ ուժը, որն անուղղակի քարոզարշավ է իրականացնում, Հայ Ազգային կոնգրես կուսակցությունն է. նրանք հայտարարեցին, թե ինչի վրա են շեշտադրում անելու իրենց ընտրական կամպանիայի ընթացքում՝ խաղաղության դիմաց Ղարաբաղի հարցի լուծում», ներկայացրեց պարոն Բադալյանը:

Անդրադառնալով նորաստեղծ «Ելք» դաշինքին, փորձագետն ասաց, որ այն «այնքան էլ հաջող չէ», այն պատճառով, որ եթե մինչև դաշինքի ստեղծումը «Լուսավոր Հայաստանը» ընդգծված արևմտամետ դիրքորոշում ուներ, ապա կուսակցության այդ գիծը «գրագետ կերպով չեզոքացվեց»:

«Անունն էլ անհաջող՝ «Ելք»: Բոլորն էլ այդպես են ասում՝ վարչապետն էլ ասաց տնտեսությունը շատ վատ վիճակում է, և մենք պետք է ելք փնտրենք ծանր վիճակից դուրս գալու համար: Հարց է առաջանում՝ ինչո՞վ է «Ելք» դաշինքը տարբերվում Հանրապետական կուսակցությունից: Ոչ մի բանով: Բոլորն էլ ելք են փնտրում: Հայ Ազգային կոնգրեսն էլ է Ղարաբաղի հարցը առաջ քաշելով փորձում իրավիճակից ելք գտնել», -նկատեց նա:

Գագիկ Ծառուկյանին սպասումը փորձագետը նորմալ է համարում, քանզի «Բարգավաճ Հայաստան» կուսակցության ողջ գրավչությունը այդ լիդերի կերչպարն է. «Եթե Գագիկ Ծառուկյանը գալիս է ուրիշ Բարգավաճ Հայաստան է, եթե չի գալիս այլ ԲՀԿ է: Լիդերային կուսակցության իմաստն այն է, որ մարդիկ գնում են ոչ թե կուսակցության հետևից, այլ լիդերի հետևից: Դրա համար սպասում են Ծառուկյանի վերադարձին»:

Պաշտպանության նախկին նախարար Սեյրան Օհանյանի վերադարձի շուրջ խոսակցությունները ու այդ վերադարձից սպասումները փորձագետն ուռճացված է համարում.

«Արհեստական գեներացում է գնում: Նա ընդամենը նախկին մի պաշտոնյա է, որի նման բազմաթիվ պաշտոնյաներ կան, որոնք պաշտոնավարումից հետո մտել են քաղաքականություն ու բացի առաջին նախագահից, ոչ մեկն էլ հաջողություն չի ունեցել: Ձախողվել են ու դարձել են միջին վիճակագրական գործիչներ»:

Քաղտեխնոլոգի համար առնվազն տարօրինակ էր՝ ինչպես է Սեյրան Օհանյանը հայտարարում, թե մտնում է քաղաքականություն, այն դեպքում, երբ 2009 թվականից նա պաշտպանության նախարար էր, որը քաղաքական պաշտոն է.

«Ինքը չի հասկանում, որ քաղաքական պաշտոն է ղեկավարում ու հայտարարում է, թե մտնում է քաղաքականություն: Հարց է առաջանում՝ նախորդ 7-8 տարին ո՞ւր էիք: Վարչապետ, նախարար, մարզպետ դրանք բոլորը քաղաքական պաշտոններ են զբաղեցնում: Արհեստական ուռճացված սպասումներ կան նրանից: Փորձ է արվում արհեստական կարևորություն տալ նրա գալստյանը»:

Ինչ վերաբերում է «Ժառանգություն» կուսակցությանը, ապա մեր զրուցակցի խոսքով, այդ կուսակցությունը վատ վիճակում է. 

«Երբ կուսակցության ղեկավարը երկար ժամանակ բացակայում է ու գտնվում այլ երկրներում, այդ կուսակցությունից ինչ-որ բան սպասելն արդարացի չէ: Կուսակցության ղեկավարը պետք է լինի կուսակցության գրասենյակում, կուսակցականների հետ: Բարձիթողի վիճակում են այդ կուսակցության գործերը»: