Ձեր վստահելի աղբյուրը

2017 թվականի հունվարի 1-ից աշխատանքի ընդունվող քաղաքացին կարող է գործատուին աշխատանքային գրքույկ չներկայացնել: Առաջիկա 3 տարվա ընթացքում աշխատանքային գրքույկները շրջանառությունից դուրս կգան, դրա փոխարեն մի քանի հարյուր հազար գրքույկներում առկա ողջ տեղեկատվությունը կթվայնացվի:

Panorama.am-ի հետ զրույցում աշխատանքի և սոցիալական հարցերի նախարարության Կենսաթոշակային ապահովութան վարչության պետ Անահիտ Գալստյանը հայտնեց, որ այս պահին Սոցիալական ապահովության պետական ծառայությունն աշխատում է գործատուների հետ:

Կազմվել է գործատուների կողմից աշխատանքային գրքույկները Հայաստանի ծառայության տարածքային բաժիններ ներկայացնելու ժամանակացույց:

«Բուն թվայնացումը կսկսի 2017-ի ապրիլի 1-ից: Մինչ այդ ժամանակացույցերը կներկայացվեն գործատուներին, նրանց հետ կհամաձայնեցվեն ժամկետները, կքննարկեն ե՞րբ և  ինչպե՞ս պետք է ներկայացնել աշխատանքային գրքույկները»,-ասաց նախարարության պաշտոնյան:

Գրքույկների շրջանառությունից դուրս գալու իրավական հիմքերը դրվեցին 2015 թվականին:
«Հարցն այն է, որ գրքույկներում առկա տեղեկատվությունն արդեն էլեկտրոնային բազաներում կա: Այսօր արդեն շատ դեպքերում մենք ասում ենք՝ գրքույկ պետք չէ, ինչպես օրինակ երեխայի խնամքի նպաստ նշանակելիս: Մենք արդեն օգտվում ենք տեղեկատվական բազայից, տեսնում ենք՝ մարդը գտնվում է խնամքի արձակուրդում: Այսինքն, առկա տեղեկատվական բազաներն արդեն հնարավորություն են  տալիս հրաժարվել թղթերից ու փոխանակել տեղեկատվությունը բազաների միջև»,-ասաց Գալստյանը:

Նրա խոսքով, այս պարագայում թվայնացվելու է գրքույկում եղած ոջ տեղեկատվությունը, որպեսզի կենսաթոշակային տարիքի հասած քաղաքացիները ստաժի հետ կապված խնդիրներ չունենան: Ծառայությունը թվայնացման գորընթացի ավարտից հետո գրքույկները կվերադարձնի գործատուներին, վերջիներս էլ՝ իրենց աշխատակիցներին:
«Դա նրանց փաստաթուղթն է»,-ասա նա:

Առաջին փուլում՝ 2017-ի ընթացքում կթվայնացվեն խոշոր գործատուների աշխատակիցների գրքույկները:
«Իրավական առումով գործընթացը մանրամասն կանոնակարգված է: Տարածքային բաժինների աշխատակիցները կապի մեջ կլինեն գործատուների հետ: Բուն թվայնացման գործընթացը սկսվելու 2017թ.-ի ապրիլ ամսից և տևելու է մինչև 2019թ. հունվար ամիսը»,-ասաց նա:



Բազաների ստեղծումից հետո հնարավոր է քաղաքացիները կարողանան ծանոթանալ, ստուգել իրենց վերաբերյալ տեղեկատվությունը: Բացի այդ, անհրաժեշտության և օրենքով նախատեսված դեպքում դրանց կարող են ծանոթանալ պետական այլ մարմինները:


Հիշեցնենք, որ Սոցիալական ապահովության պետական ծառայության պետ Արտակ Ղազարյանի հրամանով  գործատուն կարող է աշխատանքային գրքույկները ներկայացնել ՍԱՊԾ ցանկացած տարածքային բաժին:

Ժամանակացույցով սահմանված ժամկետները կարող են վերանայվել Ծառայության տարածքային բաժնի և գործատուի միջև փոխհամաձայնեցման դեպքում: Գործատուների վրա լրացուցիչ որևէ ծանրաբեռնվածություն այս առումով չի լինելու:

Գործատուները, մինչև իրենց մոտ վարվող աշխատանքային գրքույկները Ծառայության տարածքային բաժին ներկայացնելը, աշխատանքային գրքույկում լրացված վերջին էջից հետո պետք է նշեն աշխատանքային գրքույկի լրացված բոլոր էջերի թիվը և ստորագրեն (կնիքի առկայության դեպքում՝ նաև կնքեն)՝ նշելով ստորագրողի և կնքողի զբաղեցրած պաշտոնը, անունը և ազգանունը (ՀՀ Կառավարության որոշում 18.08.2016 N 882-Ն): Ցանկացած կեղծ տեղեկատվություն առաջացնելու է ՀՀ օրենսդրությամբ նախատեսված պատասխանատվություն:

ՍԱՊԾ-ում վստահ են, որ թվայնացման արդյունքում էապես կբարելավվի կենսաթոշակային և սոցիալական այլ ծառայությունների որակն ու հասցեականությունը, ինչպես նաև կնվազեն առկա բազմաթիվ ռիսկեր, այդ թվում՝ կոռուպցիոն: