Ձեր վստահելի աղբյուրը

Ծննդկան Մերի Մարգարյանի և նրա նորածին դստեր մահվան գործով այսօրվա դատական նիստում սպասվում էր, որ պետք է հարցաքննվեին երեք փորձագետներ: Սակայն նրանք չէին ներկայացել Շենգավիթ վարչական շրջանների ընդհանուր իրավասության դատարան:

Հենց դատարանի դահլիճից դատավոր Դավիթ Բալայանի կարգադրությամբ նիստերի քարտուղարը զանգահարեց փորձագետներից մեկին՝ ՀՀ գլխավոր մանկաբարձ-գինեկոլոգ Ռազմիկ Աբրահամյանին: Վերջինը պատասխանեց, որ հիվանդ է, չի կարող ներկա լինել դատական նիստին:

Երբ նրան հուշեցին, որ հաջորդ դատական նիստը կայանալու է մյուս երեքշաբթի՝ հունվարի 24-ին, վերջինը ներկայանալու մասին կասկածներ հայտնեց և ասաց, որ կարող է դատարան ուղարկել համապատասխան բժշկական փաստաթղթերը:

Հեռախոսազրույցից հետո դատավոր Բալայանը կողմերին տեղեկացրեց, որ եթե Ռազմիկ Աշոտովիչը շարունակի չներկայանալ նիստերին, ապա նրան բերման ենթարկելու որոշում կկայացվի:

Այսօրվա դատական նիստը հետաձգվեց՝ փորձագետների չներկայանալու պատճառով:

Հիշեցնենք՝ հուլիսի 27-ին ժամը 15:00-ի սահմաններում «Էրեբունի» բժշկական կենտրոն տեղափոխված Մերի Մարգարյանը մահացել էր 2015-ի հուլիսի 29-ին` հուլիսի 27-ին կատարված կեսարյան հատումից հետո: Նրա մոտ ախտորոշվել էր «ՀԵԼԼՓ/HELLP» սինդրոմ (մանկաբարձության մեջ հազվադեպ հանդիպող բարդություն) համախտանիշի թոքաբորբ: Հուլիսի 30-ին էլ մահացել էր նրա նորածին դուստրը:

Բայց Մերի Մարգարյանը դեռ հուլիսի 23-ից է գանգատներ ունեցել, բարձր է եղել նրա ջերմությունը և դիմել է իրեն հսկող բժիշկ Շուշանիկ Բախշյանին: Այս գործով ամբաստանյալներ են «Շենգավիթ» բժշկական կենտրոնի մանկաբարձ-գինեկոլոգներ Շուշանիկ Բախշյանն ու Անի Բաբելյանը, որոնք մեղադրվում են հղի Մերիին ոչ պատշաճ բուժօգնություն ցուցաբերելու համար (ՀՀ Քրեական օրենսգրքի 130 հոդված)։