Ձեր վստահելի աղբյուրը

Տիգրան Պետրոսյանի անվան շախմատի տանը շարունակվող Հայաստանի տղամարդկանց և կանանց առաջնություններում երեկ տեղի ունեցան 6-րդ տուրի պարտիաները: Տղամարդկանց մրցաշարի կենտրոնական պարտիայում Հայկ Մարտիրոսյանը սև խաղաքարերով առավելության հասավ Հայաստանի գործող չեմպիոն և ընթացիկ մրցաշարի առաջատար Զավեն Անդրիասյանի նկատմամբ ու սկսեց գլխավորել մրցաշարային աղյուսակը: 6-րդ տուրում Հովհաննես Գաբուզյանը հաղթանակ տոնեց Տիգրան Հարությունյանի նկատմամբ, իսկ Սամվել Տեր-Սահակյան-Կարեն Գրիգորյան, Արման Փաշիկյան-Տիգրան Լ. Պետրոսյան ու Մանուէլ Պետրոսյան-Ռոբերտ Հովհաննիսյան պարտիաներն ավարտվեցին ոչ-ոքի արդյունքով:

6-րդ տուրից հետո աղյուսակը գլխավորում է 4 միավոր վաստակած Հայկ Մարտիրոսյանը, Զավեն Անդրիասյանն առաջատարից հետ է մնում կես միավորով, Տիգրան Լ. Պետրոսյանը, Տիգրան Հարությունյանը, Ռոբերտ Հովհաննիսյանը, Արման Փաշիկյանն ու Սամվել Տեր-Սահակյանն իրենց ակտիվում գրանցել են 3-ական միավոր, իսկ Մանուէլ Պետրոսյանը, Հովհաննես Գաբուզյանն ու Կարեն Գրիգորյանը` 2,5-ական: Այս մասին հայտնում է chessfed.am-ը։

7-րդ տուր

Հովհաննիսյան – Անդրիասյան
Գաբուզյան – Պետրոսյան Մ.
Գրիգորյան – Հարությունյան
Պետրոսյան Տ. – Տեր-Սահակյան
Մարտիրոսյան – Փաշիկյան

Կանանց մրցաշարի 5 պարտիայից չորսն ունեցան հաղթական ավարտ: 6-րդ տուրում Արմինե Բաբայանն առավելության հասավ մրցաշարի առաջատար Աննա Հայրապետյանի նկատմամբ: Կարևոր հաղթանակներ տոնեցին Մարիա Գևորգյանն ու Սիրանուշ Ղուկասյանը: 2 անընդմեջ պարտությունից հետո հաղթանակ տոնեց նաև Մարիամ Ավետիսյանը: Տուրի միակ ոչ-ոքին գրանցվեց Սարգսյան Աննա-Գաբոյան Սուսաննա պարտիայում:

6-րդ տուրից Մարիա Գևորգյանն ու Սիրանուշ Ղուկասյանը վաստակել են 4,5-ական միավոր և կիսում են 1-2-րդ հորիզոնականները: Այսօր կայանալիք 7-րդ տուրում առաջատարները մրցելու են միմյանց դեմ: Աննա Հայրապետյանն առաջատարներից հետ է մնում կես միավորով: Մարիամ Ավետիսյանը վաստակել է 3,5 միավոր, Արմինե Բաբայանը, Աննա Սարգսյանն ու Սուսաննա Գաբոյանն իրենց ակտիվում գրանցել են 3-ական միավոր, Արփինե Գրիգոյանը վաստակել է 2 միավոր, Նարինե Գասպարյանը` 1,5, իսկ 1 միավոր վաստակած Նարե Առաքելյանը եզրափակում է մրցաշարային աղյուսակը:

7-րդ տուր

Գևորգյան – Ղուկասյան
Հայրապետյան – Գրիգորյան
Առաքելյան – Բաբայան
Գաբոյան – Ավետիսյան
Գասպարյան – Սարգսյան