Ձեր վստահելի աղբյուրը

Տոնական օրերին Հայաստան այցելող զբոսաշրջիկների թիվը փոքր-ինչ ավելացել է: Այս մասին այսօր լրագրողների հետ հանդիպման ժամանակ ասաց «Տուրիզմի ասոցիացիայի» հիմնադիր անդամ Մարինա Կպրյանը:

Նրա խոսքերով՝ ձմռանը հիմնականում Հայաստան այցելող զբոսաշրջիկները Ռուսաստանից են: «Ձմռանը  ակտիվություն է նկատվում ռուս զբոսաշրջիկների կողմից: Նրանք հիմնական այցելում են ձմեռային հանգստի զբոսաշրջային կենտրոններ` Ծաղկաձոր, Դիլիջան, Ջերմուկ: Ամանորին հյուրանոցներում գրեթե ազատ տեղեր չկային»,- նշեց Մարինա Կպրյանը:

Ըստ նրա՝ այս տարի Ամանորին տուրիստական խմբեր են եկել նաև Շվեյցարիայից,   Շվեդիայից  և Իտալիայից:

Մարինա Կպրյանի խոսքերով՝ Հայաստանը կարող է ավելի շատ զբոսաշրջիկներ ունենալ, եթե ներդրումներ արվեն և երկիրը լավ գովազդվի: «Օրինակ՝  Վրաստանում   տուրիզմը զարգացնելու համար լավ գովազդում են, նաև պետական բյուջեով են մեծ գումարներ հատկացնում: Իհարկե մենք էլ ենք գովազդում, բայց դա քիչ է: Կարծում եմ՝ մենք կարող ենք  ավելի շատ տուրիստներ ունենալ, եթե լինի մասնավոր հատված-պետություն համագործակցություն»,- ընդգծեց  Մարինա Կպրյանը:

Հարցին, թե օրինակ՝  լեռնադահուկային զբոսաշրջությունը կարո՞ղ է մրցակցել Վրաստանի հետ, հաշվի առնելով գինն ու որակը, նա պատասխանեց՝ «Դահուկային տուրիզմի առումով գները գրեթե նույն են, ուղղակի, էլի եմ կրկնում, ավելի լավ գովազդված է, բայց ոչ ավելի լավ որակ ունի, ոչ ավելի լավ ծառայություններ ու հնարավորություններ: Ռուսաստանը, որը ոչ շատ լավ բարեկամական հարաբերություններ ունի Վրաստանի հետ, ՌԴ-ից անցյալ տարի ավելի շատ են զբոսաշրջիկներ գնացել Վրաստան: Պատճառը՝ ճիշտ մարկետինգային քաղաքականությունն է»:

Մանրամասները՝ տեսանյութում: