Ձեր վստահելի աղբյուրը

«Տեղեկատվական տեխնոլոգիաների ոլորտում մինչև 2025 թվականը 40 հազար աշխատատեղ ստեղծելու համար պետք չէ հատուկ ռազմավարական ծրագիր մշակել, մեր բնականոն հունով կարող ենք հասնել այդ թվին, նշաձողը պետք է լինի 70-80 հազար աշխատատեղ ստեղծելը»,- այս մասին այսօր լրագրողների հետ հանդիպման ժամանակ ասաց Ինֆորմացիոն տեխնոլոգիաների ձեռնարկությունների միության (ԻՏՁՄ) գործադիր տնօրեն Կարեն Վարդանյանը:

Նրա խոսքերով՝ այն ռազմավարական ծրագրերը, որոնք նախատեսում են իրականացել` սկսած դպրոցներում ինժեներական լաբորատորիաների ստեղծումից, Պոլիտեխնիկի կցումը պաշտպանության նախարարությանը, ռազմական հետազոտությունների խթանումը, դա պետք է մինչև 2025 թ-ը ստեղծի  80 հազար աշխատատեղ, որովհետև 40 հազար աշխատատեղը դա կարող է լինել գործունեության սովորական տեմպի դեպքում:

Անդրադառնալով օրեր առաջ վարչապետ Կարեն Կարապետյանի գլխավորությամբ կառավարությունում տեղի  ունեցած տեղեկատվական և հեռահաղորդակցության տեխնոլոգիաների (ՏՀՏ) բնագավառի զարգացման վերաբերյալ հերթական քննարկմանը՝  ԻՏՁՄ-ի գործադիր տնօրենն ասաց, որ իրենց միությունը հրավիրված չէր այդ հանդիպմանը. «Չգիտեմ ինչու մենք հրավիրված չէինք, բայց միությունից անդամներ ներկա են եղել: Ինձ թվում է՝ պատահականություն է եղել, որ մեզ չեն հրավիրել: Նոր վարչապետը երևի դեռ չի կողմնորոշվել, թե ովքեր են դաշտում խաղացողները: Հուսով եմ՝ կշտկվի և մենք կմասնակցենք ռազմավարական ծրագրի քննարկմանը»,- ասաց նա:

Կարեն Վարդանյանը խոսելով ոլորտի հետագա զարգացման մասին՝  նշեց, որ  Հայաստանում նախ պետք է որակյալ մասնագետներ պատրաստեն. «Հիմա ամբողջ աշխարհում տաղանդի սով է, Եվրոպայում և ԱՄՆ-ում այսօր 2 միլիոն թափուր աշխատատեղ կա ՏՏ ոլորտում, այդ թիվը 2018-ին կդառնա 3 միլիոն, իսկ 2021թ-ին՝ 5 միլիոն: Մենք դեռ չգիտենք, թե 5 տարի հետո ինչպես է փոփոխվելու  ոլորտի բովանդակությունը` նոր համակարգիչներ, նոր տեխնոլոգիաներ, նոր մոտեցումներ և այլն»:

Ներկայացնելով Միության ռազմավարությունը՝ Կարեն Վարդանյանն ասաց, որ առաջին հերթին շեշտը դնում են կրթության որակի բարձրացմանը, բիզնեսի զարգացմանը, Կառավարության հետ համագործակցությանն ու Հայաստանի բրենդը դրսում ներկայացնելուն:

Նրա խոսքերով՝ 2019 թվականին տեղի է ունենալու ՏՏ ոլորտի համաշխարհային կոնգրես, որտեղ ակնկալում են՝ Հայաստանը այդ կոնգրեսին կներկայանա որպես միակ և առաջին երկիրը աշխարհում, որը բոլոր դպրոցներում կիրառել է նախնական ինժեներական կրթություն: Սա, ըստ նրա, մեծ հետաքրքրություն կառաջացնի, և Հայաստան կարող են գալ աշխարհի թիվ մեկ ընկերությունների թիվ մեկ մարդիկ:

«Դրա շնորհիվ Հայաստանի բիզնեսը կարող է աներևակայելի քայլ անել առաջ»,- ասաց Կարեն Վարդանյանը` հավելելով, որ դրա համար անհրաժեշտ է կառավարության աջակցությունը, որպեսզի մեծ թվով դպրոցներում այդ լաբորատորիաները բացվեն:

Անդրադառնալով պաշտպանության նախարարության հետ համագործակցությանը՝ ԻՏՁՄ գործադիր տնօրենը  դրական համարեց ռազմարդյունաբերական ոլորտի պատասխանատու, փոխնախարար Դավիթ Փախչանյանի հետ համագործակցությունը. «Մենք ինժեներների մոբիլիզացիա ենք անում ապրիլի 2-ից հետո: Բարձր տեխնոլոգիաների ոլորտի ինժեներները, որոնք զինատեսակներ են արտադրում բանակի համար, դրանց զգալի մասը ցուցադրել ենք և հաջողություններ ենք ունեցել փորձարկումների ժամանակ»: