Ձեր վստահելի աղբյուրը

Չնայած այն հանգամանքին, որ սա գործընթացում ներգրավված երկրների քննարկման թեման է, բայց միանշանակորեն մամուլի ազատության հարցը մեզ համար կարևոր է, և մենք այդ մասին ամեն անգամ ասում ենք: Անդրադառնալով Ռուսաստանի և Իսրայելի քաղաքացի Ալեքսանդր Լապշինի՝ Բելառուսի կողմից Ադրբեջանին արտահաձնելու գործընթացին՝ նշել է  ԱՄՆ Պետքարտուղարության պաշտոնական ներկայացուցիչ Ջոն Քիրբին:

«Առաջինն ուզում եմ նշել, որ սա իրականում մի գործընթաց է, որի մասին պետք է խոսեն դրանում ներգրավված երկրները, հատկապես, երբ խոսքն արտահանձնման դիմումների մասին է: Այդ մասին իսկապես պետք է այդ երկրները խոսեն: Ակնհայտ է, որ մամուլի ազատությունը կարևոր է մեզ համար, և մենք միշտ խոսում ենք այդ մասին»,- նշել է Քիրբին:

Լրագրողների դիտարկմանը, թե Ադրբեջանը բլոգերին մեղադրում է Լեռնային Ղարաբաղ այցելելու և, ըստ ադրբեջանական կողմի, իրենց հասցեին ոչ հաճո մի քանի հայտարարություններ անելու մեջ, արդյոք Միացյալ Նահանգները մտահոգված չէ լրագրողների ազատ տեղաշարժը խոչընդոտելու երևույթներով՝ Քիրբին հայտարարել է, որ մամուլի ազատության հետ կապված խնդիրները միշտ են իրենց մտահոգության տիրույթում, սակայն նորից կրկնել է, որ Լապշինի արտահանձնման հետ կապված մեկնաբանություններ պետք է տան գործընթացում ներգրավված երկրները:

Ավելի վաղ բլոգերի արտահանձնմանն էր անդրադարձել նաև ՌԴ արտգործնախարար Սերգեյ Լավրովը՝ նշելով, , որ Ռուսաստանը դեմ  է լրագրողների կամ այլ անձանց  կողմից այս կամ այն  տարածք այցելելը քրեականացնելուն: Մոսկվան համաձայն չէ ձերբակալվածին այս կամ այն երկրին արտահանձնելուն: