Ձեր վստահելի աղբյուրը

Հրանտ Դինքի սպանության 10-րդ տարելիցի կապակցությամբ  Թբիլիսիի Սուրբ Էջմիածին եկեղեցում հունվարի 21-ին երեկոյան ժամերգությունից հետո կկատարվի հոգեհանգստյան կարգ, որից հետո «Հայարտուն» կենտրոնի Գալուստ Գյուլբենկյան սրահում կբացվի թուրք լուսանկարիչ Ումութ Վեդաթի «Ո՞վ եմ ես» խորագրով  լուսանկարչական աշխատանքների ցուցահանդեսը:

aliq.ge կայքը գրում է, որ Վեդաթը  Թուրքիայում  լքված հայկական եկեղեցիների, ամայացած գյուղերի ու քաղաքների պատկերներով փորձում է բարցրաձայնել այն ճշմարտությունը, որը թուրքական պետությունը՝ ոչնչացնելով հայկական հետքը, պարտադրում է մոռանալ ու վերացնել, մերժել ու արհամարհել: 

Լուսանկարները  Թուրքիայում հայկական հոգևոր ու մշակութային ժառանգության խոսուն վկաներն են, իսկ Թբիլիսիիում բացվող ցուցահանդեսը նաև բողոք է խտրականության, պատմական անարդարության դեմ, և նվիրվում է երկու ժողովուրդների հաշտեցմանը ձգտող Հրանտ Դինքի հիշատակին:

Ումութի լուսանկարների ցուցահանդեսը բաց է լինելու մինչև փետրվարի 1-ը։ 

Հիշեցնենք, որ Հրանտ Դինքը սպանվել է 2007թ. հունվարի 19-ին՝ Ստամբուլի Շիշլի թաղամասում գտնվող «Ակոս» թերթի խմբագրատան մուտքի մոտ՝ թիկունքից հասցված հրազենային վնասվածքից: Դինքի սպանության մեղադրանքով կարճ ժամանակ անց ձերբակալվել է Օգյուն Սամասթը, որը խոստովանել է իր հանցանքը: Հանցագործությունը պատվիրված և կազմակերպված է եղել: Սպանության բացահայտմանն ուղղղված քրգործը հետաքննվում է մինչև օրս: