Ձեր վստահելի աղբյուրը

«Թուրք ստահակ չարագործի ձեռքով տասը տարի առաջ այս օրը զոհվեց մեր ամենամեծ հայերից մեկը, և այսօր աշխարհի առաջադեմ մարդկությունը, ողջ հայ ժողովուրդը, թուրք մտավորականությունը սգում է, հիշում է մեր Հրանտ Դինքի մահը»,-այսօր սփյուռքի նախարարությունում կազմակերպած «Հրանտ Դինք. 10 տարի անց» խորագրով կլոր սեղան-քննարկումից առաջ լրագրողների հետ զրույցում ասաց սփյուռքի նախարար Հրանուշ Հակոբյանը:

«Դինքի գաղափարները, մտքերը, տեսակետները ապրում են և կշարունակեն ապրել, որովհետև նրա մտածողության մասշտաբները շատ լայն էին, մեծ էին , համամարդկային էին և նրա ստեղծած «Ակոս» թերթը հենց շարունակությունն է իր ամբողջ գաղափարախոսության:  Թուրքիայի խորհրդարանում այսօր Գարո Փայլանը Դինքի գործի շարունակողն է դարձել: Թուրք իշխանավորները պետք է հասկանան, որ Փայլանի կողքին է ողջ հայ ժողովուրդը, միջազգային հանրությունը, մեր բոլոր հզոր և կայացած մտավորականները»,-ասաց նախարարը:

Հրանուշ Հակոբյանը նշեց, որ նախարարությունում կազմակերպած կլոր-սեղան քննարկման նապապակն է՝ հիշել հայ խմբագրին, խոնարհվել նրա հիշատակի առաջ, քննարկել նրա գաղափարները, մտքերը, տեսակետները, որոնք վերաբերում էին հրապարակախոսությանը, լրագրությանը, հայ թուրքական հարաբերություններին, փոքրամասնության իրավունքներին, Թուրքիայի Եվրոպական միության անդամ դառնալու հնարավորուււթյուններին. «Շատ բան ունենք մենք սովորելու Հրանտից: Որպես գիտնական, որպես լրագրող նրա յուրաքանչյուր հրապարակախոսական հոդված կամ գիրք վերլուծելով, կարծում եմ, մեր գիտական հասարակությունը կարող է շատ բան վերցնել նրանից: Ընդհանրապես Հրանտ Դինքը որպես խիզախ, համարձակ, որպես տեսակետ ունեցող անհատականություն՝ դաս և օրինակ է հատկապես այսօրվա երիտասարդության համար»:

Ինչ վերաբերում է Հրանտ Դինքի սպանության դատավարությանը՝ սփյուռքի նախարարն ասաց. «Մենք պետք է հաշվի առնենք, որ այդ դատավարությունը տեղի է ունենում թուրքական հասարակության մեջ, իսկ տասը տարի շարունակ ձգձգվող այս ֆարսը ևս մեկ անգամ ապացուցում է, որ Դինքի սպանությունը քաղաքական սպանություն էր»: