Ձեր վստահելի աղբյուրը

Ախալցխայում վաճառվում է հայ մեծանուն նկարիչ Վարդգես Սուրենյանցի տունը: akhaltskha.net-ի հաղորդմամբ, տան սեփականատերն ասել է, որ Վարդգես Սուրենյանցի տունը պահպանել է իր նախկին տեսքը, և նա միտումնավոր այն չի վերանորոգել ժամանակակից ձևով, քանզ որ դեռ մտածում է, որ կգտնվեն մարդիկ, ովքեր կցանկանան գնել Վարդգես Սուրենյանցի տունը և կվերածեն այն թանգարանի:

Վարդգես Սուրենյանցի տունը ունի միջին չափեր հինգ սենյակ և տան հետևի մասում փոքրիկ պարտեզ: Տունը ներկայումս վաճառվում է 90 000 դոլարով:

2009 թվականի օգոստոսի 1-ին Ախալցխայում նկարչի տան պատին տեղադրվեց  հայ մեծանուն նկարիչ Վարդգես Սուրենյանցին նվիրված հուշաքար:

Վարդգես Սուրենյանցը ծնվել է 1860 թվականին Ախալցխայում, հոգևորականի ընտանիքում։ Նախնական կրթություն ստացել է Լազարյան ճեմարանում, այնուհետ շարունակել ուսումը Մոսկվայի մեծ հեղինակություն ունեցող գեղանկարչության, քանդակագործության և ճարտարապետության ուսումնարանի ճարտարապետության բաժնում։ Իբրև նկարիչ ձևավորվել է Մյունխենի կայսերական ակադեմիայում։ Սուրենյանցը ապրել և ստեղծագործել է օտար երկնքի տակ, բայց իր ամբողջ էությամբ և հոգու ամեն մի թելով կապված է եղել հարազատ ժողովրդին, եղել նրա բախտակիցը, հույզերի ու խոհերի թարգմանը։