Ձեր վստահելի աղբյուրը

ԵԱՀԿ Մինսկի խմբի համանախագահների դիրքորոշումը ղարաբաղյան հիմնահարցի կարգավորման բանակցություններում վաղուց հայտնի է, որևէ դիրքորոշում չի փոխվել: Այսօր լրագրողների հետ ճեպազրույցում հայտարարեց Հայաստանի Արտաքին գործերի նախարարի տեղակալ Շավարշ Քոչարյանը՝ պատասխանելով ՌԴ ԱԳ նախարար Սերգեյ Լավրովի վերջին հայտարարության մասին հարցին:

«Մինսկի խմբի համանախագահների դիրքորոշումը հայտնի է նաև այն հայտարարություններից, որոնք արել են համանախագահող երկրների նախագահները: Ուղղակի Ադրբեջանը միշտ դրանից դուրս է գործել: Իսկ տվյալ պարագայում մի լրագրող իրեն թույլ է տվել այնպիսի մի անպարկեշտ հայտարարություն, որն ուղղակի բերել է նրան, որ Լավրովը բացահայտել է այն, ինչ առանց այն էլ ակնհայտ է»,-հայտարարեց Քոչարյանը:

Լրագրողը փորձեց հստակեցնել՝ լրագրողի հարցն է՞ եղել պատճառը, որ Լավրովն այդպես է արտահայտվել, թե՞ դա Ռուսաստանի դիրքորոշումն է, Քոչարյանը արձագանքեց.

«Համանախագահները սովորաբար զգուշավոր են խոսում, տվյալ պարագայում լրագրողի հարցը, ներողություն, այնքան լկտի էր, որ պարտադրեց բացահայտել»:

Դիտարկմանը, թե ԵԱՀԿ Մինսկի խմբի համանախագահների հայտարարությունները հավասարության նշան են դնում Ադրբեջանի և Հայաստանի միջև, ՀՀ փոխարտգործնախարարը պատասխանեց.

«Մինսկի խմբի համանախագահների հայտարարությունները միշտ էլ այդպես են եղել: Ու դա թերի է նաև նրանով, որ չկա հասցեագրում, իսկ դա հնարավորություն է տալիս Բաքվին գործել ավելի սանձարձակ»:

Հիշեցնենք՝ Մոսկվայում ասուլիսի ժամանակ Ռուսաստանի արտգործնախարար Սերգեյ Լավրովը հայտարարել էր, որ Լեռնային Ղարաբաղի հակամարտության գոտում միջադեպերի քննության մեխանիզմների ներդրման և դիտորդների թվի ընդլայնման մասին համաձայնությունները, որոնք ձեռք են բերվել 2016-ի ապրիլյան իրադարձություններից հետո, մինչ այժմ չեն իրականացվել ԵԱՀԿ-ի ներսում կոնսենսուսի բացակայության պատճառով: Իսկ պատճառների մասին նա խորհուրդ էր տվել հետաքրքրվել ԵԱՀԿ ներկայացուցիչներից:

Ադրբեջանցի լրագրողը այդ ասուլիսում հետաքրքրվել էր, թե ինչպիսի՞ն կլինի Մոսկվայի դիրքորոշումը, եթե Ադրբեջանը սկսի «ազատել իր օկուպացված տարածքները», արդյոք Մոսկվան ա՞չք կփակի, թե՞ «կմիջամտի Ադրբեջանի ներքին գործերին»: Ի պատասխան ՌԴ արտգործնախարարն ասել էր, որ Լեռնային Ղարաբաղի հակամարտության կարգավորումը վերացական չէ և «բացառապես Ադրբեջանի ներքին գործերի թեմա չէ», դրա վերաբերյալ «որոշումների մի ամբողջ հավաքածու» գոյություն ունի:

Նաև նշել էր . «Օկուպացված տարածքներն ազատելու ՄԱԿ-ի Անվտանգության խորհրդի պահանջը պահպանում է ուժը, սակայն ոչ մի դեպքում՝ ուժի միջոցով, և Լեռնային Ղարաբաղի վերջնական կարգավիճակը որոշելու պարագայում»: