Ձեր վստահելի աղբյուրը

Հարավային Կորեայի ընդդիմադիր քաղաքական գոծիչները քննադատել են Սեուլի դատարանի վճիռը, որով մերժվել է դատախազության՝  Samsung ընկերության փաստացի տնօրեն Լի Չժե Յոնին ձերբակալելու մասին պահանջը: ՏԱՍՍ-ը գրում է, որ քննությունը կասկածում է նրան կաշառակերության, ընկերության գումարները հափշտակելու և սուտ վկայություն տալու մեջ: Բայց դատարանը համարել է, որ ներկայացված ապացույցները բավարար չեն ձերբակալության համար:

«Ցավալի է, որ նման որոշում է կայացվել»,- ասել է երկրի նախագահի ընդդիմադիր թեկնածու Մուն Չժե Ինը: Նրա խոսքով, Լի Չժե Յոնի ձերբակալության պահանջի մերժումը հնարավոր է խանգարի քննության ընթացքին:

Դեմոկրատական կուսակցության ներկայացուցիչը նույնպես կարծում է, որ  դատարանի վճիռը կարող է խանգարել կոռուպցիոն սկանդալի անկախ հետաքննություն անցկացնելուն:

Samsung Electronics-ի փոխտնօրեն Լի Չժե Յոնը հոր հիվանդության պատճառով արդեն մի քանի տարի ընկերության փաստացի ղեկավարն է: Հետաքննության համաձայն, հենց նա է որոշել ֆինանսական աջակցություն ցուցաբերել երկրի նախագահ Պակ Կին Հեի մոտ ընկերուհուն:

Քննիչները կարծում են, որ Samsung Electronics-ը նախագահի ընկերուհու կողմից ղեկավարվող գերմանիայում գտնվող ընկերության հաշվին փոխանցել է մոտ 18 մլն դոլար՝ իբրև խորհրդատվական ծառայությունների համար, սակայն իրականում այդ միջոցներն ուղղվել են ձիերի ձեռքբերմանն ու նրա դուստրերի ուսուցմանը։ Բացի այդ, կորպորացիան մոտ 17 մլն դոլար է տրամադրել երկու ոչ կառավարական հիմնադրամների:

Samsung Electronics-ից հայտնել են, որ ներդրումները կատարվել են նախագահի ճնշման տակ, այդ իսկ պատճառով տվյալ իրավիճակում ընկերությունը տուժող կողմ է: