Հինգ շախմատիստ վերջին տուրից առաջ գլխավորում են Հայաստանի տղամարդկանց առաջնության աղյուսակը
Երեկ տեղի ունեցան Հայաստանի տղամարդկանց և կանանց առաջնությունների 8-րդ տուրի պարտիաները:
Տղամարդկանց մրցաշարում առաջատարներից երկուսը՝ Զավեն Անդրիասյանն ու Արման Փաշիկյանը, խաղում էին միմյանց դեմ: 28-րդ քայլին պարտիան ավարտվեց ոչ-ոքի արդյունքով: Մյուս առաջատար Հայկ Մարտիրոսյանը կարճատև պայքարից հետո հաշտություն կնքեց Սամվել Տեր-Սահակյանի հետ, մրցաշարի 4-րդ առաջատար Տիգրան Լ. Պետրոսյանը նույնպես ոչ-ոքի խաղաց: Ռոբերտ Հովհաննիսյանի նկատմամբ կարևոր հաղթանակ տոնեց և առաջատարների խմբին միացավ Հովհաննես Գաբուզյանը: 8-րդ տուրում մրցաշարում առաջին հաղթանակը տոնեց Մանուէլ Պետրոսյանը: Այս մասին տեղեկացնում է chessfed.am-ը։
Մրցաշարի վերջին տուրից առաջ հինգ շախմատիստ՝ Տիգրան Լ. Պետրոսյանը, Զավեն Անդրիասյանը, Արման Փաշիկյանը, Հովհաննես Գաբուզյանն ու Հայկ Մարտիրոսյանը վաստակել են 4,5-ական միավոր և գլխավորում են մրցաշարային աղյուսակը: Մրցաշարի մյուս հինգ մասնակիցները՝ Կարեն Գրիգորյանը, Սամվել Տեր-Սահակյանը, Ռոբերտ Հովհաննիսյանը, Մանուէլ Պետրոսյանն ու Տիգրան Հարությունյանը վաստակել են 3,5-ական միավոր:
9-րդ տուր
Գաբուզյան – Անդրիասյան
Գրիգորյան – Հովհաննիսյան
Պետրոսյան Տ. – Պետրոսյան Մ.
Մարտիրոսյան – Հարությունյան
Փաշիկյան – Տեր-Սահակյան
Կանանց մրցաշարի 5 պարտիայից չորսն ունեցան հաղթական ավարտ: Մրցաշարի առաջատար Սիրանուշ Ղուկասյանն առավելության հասավ Աննա Սարգսյանի նկատմամբ, Մարիա Գևորգյանը ուժեղ գտնվեց Աննա Հայրապետյանից: Նախավերջին տուրում հաղթանակներ տոնեցին նաև Սուսաննա Գաբոյանն ու Մարիամ Ավետիսյանը: Միակ ոչ-ոքին գրանցվեց Արփինե Գրիգորյան – Նարե Առաքելյան պարտիայում:
Վերջին տուրից առաջ աղյուսակը գլխավորում է 6,5 միավոր վաստակած Սիրանուշ Ղուկասյանը, 2-րդ հորիզոնականում ընթացող Մարիա Գևորգյանն առաջատարից հետ է մնում մեկ միավորով, Սուսաննա Գաբոյանն ու Աննա Հայրապետյանը վաստակել են 5-ական միավոր, 5-րդ հորիզոնականում ընթացող Մարիամ Ավետիսյանը վաստակել է 4,5 միավոր, Արմինե Բաբայանն ու Աննա Սարգսյանը իրենց ակտիվում գրանցել են 4-ական միավոր, Արփինե Գրիգորյանն ունի 2,5, իսկ Նարե Առաքելյանն ու Նարինե Գասպարյանը՝ 1,5-ական միավոր:
9-րդ տուր
Հայրապետյան – Ղուկասյան
Առաքելյան – Գևորգյան
Գաբոյան – Գրիգորյան
Գասպարյան – Բաբայան
Սարգսյան – Ավետիսյան
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
