Ձեր վստահելի աղբյուրը

«Շատ-շատ հարգում եմ Սեյրան Օհանյան զինվորին, որպես զինվոր հրաշալի օրինակ է արցախյան պատերազմին տված իր ներդրումով, իր առողջությամբ, մարդ որը վիրավորվելուց մեկ ամիս հետո վերադարձավ դիրքեր», -այսօր ԵԼՔ դաշինի համաժողովից հետո լրագրողների հետ ճեպազրույցում հայտարարեց դաշինքի անդամ, Հանրապետություն կուսակցության նախագահ Արամ Սարգսյանը:

Քաղաքական գործիչն ասաց նաև, որ ինքը շատ լավ ճանաչում է նաև Սեյրան Օհանյան մարդուն, որը հարազատաբար է վերաբերվել իրենց, բայց միևնույն ժամանակ, ասաց, որ չի ճանաչում Սեյրան Օհանյան քաղաքական գործչին:

«Ես չգիտեմ՝ ինչ նպատակներով է նա քաղաքական դաշտ գալիս: Միայն ֆեյսբուքյան հայտարարությունները բավարար չեն եզրակացնել՝ ինչ ուղի, ինչ ճանապարհ է ընտրել: Ավելին, նա պետք է մտնի հանրության մեջ, լսի՝ լրագրողներն իրեն ինչ հարց են տալիս: Ինչ վերաբերում է իմ անձնական կարծիքին, ես գտնում եմ, որ սկիզբը, որը Սեյրան Օհանյանը դրեց և այն կուսակցությունները, այն շրջանակը, ում հետ փորձում է համագործակցել, այդքան էլ օգտակար չէ ու այդ շրջանակով հաջողության հասնելը հայ իրականության մեջ անհնարին է կամ գրեթե անհնարին է», -հայտարարեց Սարգսյանը:

Խոսելով ՀՀ նախկին արտգործնախարար Վարդան Օսկանյանի մասին, Սարգսյանն ասաց, որ նրա հետ աշխատել է ու նրան համարում է «շատ խելացի մարդ»: «Ափսոս, նա այդ խելքը ծառայեցրել է Ռոբերտ Քոչարյանին ու այդ պատճառով էլ կրակն է ընկել», -ասաց նա: