Ձեր վստահելի աղբյուրը

Այսօր ԵԼՔ դաշինքի առաջին համաժողովից հետո լրագրողների հետ զրույցում «Հանրապետություն» կուսակցության քաղխորհրդի նախագահ Արամ Սարգսյանը հիշեց ՀՀ առաջին նախագահ Լևոն Տեր-Պետրոսյանի հայտնի խոսքը ուղղված այն ժամանակների լրագրող Սերգո Երիցյանին. «Սերգո ջան լավ չես ապրի, քանի դեռ Ղարաբաղի հարցը չի լուծվել»:

«Հիմա հավի-ձվի պատմությունը դարձնել, թե գիտես ինչ Սերգոն լավ կապրի, եթե Ղարաբաղի հարցը լուծվի, կամ Սերգոն լավ չի ապրի, քանի դեռ Ղարչաբաղի հարցը չլուծվի, չէի ուզենա խնդրին այսպես մոտենալ: Ղարաբաղի հարցը շատ-շատ կարևոր է, բայց լավ ապրելու համար առաջին հերթին արդարություն է պետք: Նույնիսկ պատերազմի ժամանակ, երբ հացը հավասար են կիսել, մարդիկ էդ հավասար կիսած հացով կռվել են ու հաղթել», -հայտարարեց Արամ Զավենիչը:

Սարգսյանի խոսքով, հայաստանի երեք նախագահներն էլ խոսել են փոխզիջումների մասին, չեն վախեցել ու բարձրաձայնել են այդ հարցի մասին, ի տարբերություն Ադրբեջանի, որտեղ հային գլխատած մարդասպանը հերոսացվել է:

«Իրենք իրենց հանրությանը նախապատրաստում են թշնամության: Եթե այդ երկիրը ամբողջությամբ թշնամական մթնոլորտում է, ինչպես կարող ես այդ երկրի հետ գնալ բանակցության, գնալ փոխզիջման, զիջել տարածքներ», -նշեց նա:

Այս փուլում, ըստ Սարգսյանի, պետք է համանախագահ երկրների առաջարկներն ի կատար ածել՝ ԵԱՀԿ նախագահի անձնական ներկայացուցչի լիազորությունների մեծացում, հետաքննության մեխանիզմների ներդրում, մշտադիտարկման սարքերի տեղակայում և այլն:

«Վստահաբար այս մոտեցումը մեզ ձեռնտու է: Հիմա գոնե ամրացնենք մեր դիրքերը: Ուժեղ Հայաստան է պետք ունենալ, որ մեր զինվորը ոչ թե դրսում կանգնի, այլ ունենա ինժեներական համապատասխան կառույցներ, որտեղ սենյակում նստած, հեռուստաէկրանների առաջ կարողանա վերահսկել սահմանը, որ թիկունքից չգան ու լվացվելու ժամանակ զինվոր սպանեն: սրանք խնդիրներ են, որ պետքությունը պետք է լուծի», -հայտարարեց Արամ Սարգսյանը: