Ձեր վստահելի աղբյուրը

«Նոր Հայաստան» շրժման առաջնորդ Անդրիաս Ղուկասյանը, որը հուլիսյան դեպքերից հետո գտնվում է անազատության մեջ, այսօր հայտարարություն է տարածել, որում նշվում է հետևյալը.

«Հայաստանի լրագրողները հուլիսի 29-ին ցուցաբերեցին բարձր մակարդակի պրոֆեսիոնալիզմ և համարձակություն` Սարի թաղում և Խորենացի փողոցում խաղաղ ցուցարների դեմ ոստիկանության և վերջինիս հետ համագործակցող քաղաքացիական հագուստով սադրիչ-գրոհականների ապօրինի գործողությունների լուսաբանման ժամանակ:

Այդ օրը լրագրողներից շատերը դարձան բռնության զոհ, բայց ողջ հանրությանը ցույց տվեցին, թե ինչպես են բարձրաստիճան ոստիկանները համակարգում սադրիչների գործողությունները քաղաքացիների դեմ բռնություն հրահրելու նպատակով:

Արդեն 6 ամիս է, ինչ ԶԼՄ-երի կողմից հրապարակված տեսագրություններում բացահայտված են Սարի թաղում տեղի ունեցածը, սակայն առ այսօր իմ և իմ ընկերների դեմ շինծու մեղադրանքով դատավարությունների ժամանակ քննիչները, դատախազները և դատավորները հրաժարվում են ընդունել այդ տեսագրությունները որպես գոյություն ունեցող ապացույցներ:

Նույնիսկ երբ դատարանը ստիպված է լինում հետազոտել այդ տեսագրությունները և դատավորները սեփական աչքերով տեսնում են, որ մեզ ներկայացված մեղադրանքները հիմնազուրկ են, իսկ դրա հիմքում դրված ոստիկանների ու գործակալների ցուցմունքները` ակնհյատորեն սուտ, նրանք իրենց որոշումներում թաքցնում են այդ տեսագրությունները հետազոտելու փաստը, չնշելով անգամ դրանց առկայության մասին:

Դատարանը նույն ճակատարգրին է արժանացնում նաև իրականությունը ներկայացնող բազմաթիվ լրագրողների և հավաքի մասնակիցների ցուցմունքները, հրաժարվելով պահանջել և հետազոտել այդ ապացույցները:

Քանի որ դատարանն իր այդ գործողություններով ինձ առ այսօր զրկում է ապօինի մեղադրանքից և կալանավորումից պաշտպանվելու բոլոր արդյունավետ միջոցներից, թողնելով միայն նիստերին ձևական մասնակցելու հնարավորությունը, ի բողոք դրա ես հրաժարվում եմ մասնակցել կալանքի ժամկետը հերթական անգամ երկարացնելու վերաբերյալ 25.01.2017 թ. դատական նիստին»: