Ձեր վստահելի աղբյուրը

«Ծիծաղելի է այսօր խորհրդարանում մի քանի տեղ ունենալու համար քեզ կոտորես, երբ ազգդ այսպիսի ծանր վիճակում է, երբ երկիրը գնում է կործանման», -Panorama.am-ի թղթակցի հետ զրույցում ասաց ԱԻՄ առաջնորդ Պարույր Հայրիկյանը՝ բացատրելով Օհանյան-Օսկանյան-Դալլաքյան-Սարգսյան դաշինքին միանալու իր որոշումը:

Հիշեցնենք՝ այդ դաշինքին միանալու մասին Հայրիկյանը հայտարարել էր հունվարի 22-ին, իր ֆեյսբուքյան էջում:

Հայրիկյանը տեղեկացրեց, որ դիմել են «ԵԼՔ»-ին միանալու իրենց դաշինքին, սակայն իրենց զանգերին ոչ մի կերպ չեն արձագանքել: Իսկ այս դաշինքը արձագանքել է ,անմիջապես կապի մեջ են մտել, ու որոշումը կայացվել է:

«Արամ Սարգսյանի հետ հին կապեր ունենք ընկերական, Օսկանյանի հետ տարբեր հարցերովշփվել ենք, Սեյրան Օհանյանը, երբ բանակում էր, ես Գորիսի պարետն էի, բացի այդ պաշտպանական համակարգում մի քանի նախագծեր Սեյրան Օհանյանի հետ էի քննարկում: Իսկ Վիկտոր Դալլաքյանի հետ աշխատել ենք Ազգային ժողովում», -դաշինքի լիդերների հետ կապը փորձեց վերականգնել Հայրիկյանը:

Նա ասաց նաև, որ իր համար ոչ թե տարօրինակ, այլ ուրախալի է, որ Սեյրան Օհանյանը դուրս է եկել իշխանությունից ու նկատեց. «Եթե հիմա Հովիկ Աբրահամյանն էլ գա, ես սիրով կասեմ՝ արի, միասին աշխատենք՝ Հայաստանը կարգին երկիր դարձնելու ուղղությամբ: Դա է իմ աշխատելաոճը, հակառակ դեպքում ես մեր ժողովրդին չէի կարողանա նվիրել անկախության հանրաքվեի ճանապարհով ռազմավարությունը»:

Հարցին, թե ինչպե՞ս է ընդգծված հակառուսական Հայրիկյանը դաշինք կազմում ընդգծված ռուսական Արամ Սարգսյանի հետ (Հայաստանի Դեմոկրատական կուսակցություն), ԱԻՄ առաջնորդը պատասխանեց.

«Այո, այդպիսի մակերեսային ընկալում կա: Բայց ուշադիր չեն կարդում իմ հայտարարությունները, որ ասել եմ՝ ես հակաամերիկյան, հակաեվրոպական կլինեի, եթե այդ կողմերից ագրեսիվ տրամադրություններ նկատեի Հայաստանի նկատմամբ: Ես, որպես հայ մարդ, դեմ եմ, որ ռուսական «Գազպրոմը» մենաշնորհ է հաստատել Հայաստանում ու գազը թանկ վաճառում: Ես ռուս ընկերներ ավելի շատ ունեմ ու դրանք նշանավոր մարդիկ են»:

Դիտարկմանը, թե որոշ շրջանակներում այդ դաշինքը անվանել են «աջաբ-սանդալ», Հայրաիկյանը արձագանքեց. «Նրանք, ովքեր ակնկալում են գաղափարների դաշինք, չգիտեն, որ գաղափարների դաշինքը հանգեցնում է մեկ կուսակցության: դաշինքը լինում է գաղափարական տարաձայնությունների միջև: Սա նպատակային դաշինք է: Այսինքն՝ ժամանակավոր համագործակցություն հանուն այն բանի, որ կարողանանք Հայաստանը դարձնել քաղաքացիներին պատկանող երկիր»:

Դաշինքում ո՞ւմ է պատկերացնում որպես վարչապետի թեկնածու հարցին ի պատասխան, Հայրիկյանն ասաց, որ իր համար այդ հարցը սկզբունքային չէ:

«Առաջին տեղի համար պայքարում են նրանք, ովքեր ճակատագրով առաջին տեղում չեն ու չեն կարող լինել: Ինձ համար գիտե՞ք ինչով սկզբունքային կլինի: Այն մարդիկ, ովքեր կասեն՝ թող Հայրիկյանը լինի ասենք թե 5-րդը, հետո այդ մարդիկ իրենց երեխաներին պիտի նայեն ամաչելով, թե գիտեք՝ Հայրիկյանը մեր հետ էր, մենք փոխանակ համախմբվեինք նրա շուրջը… դա ինձ համար հարց չէ: Նա, ով ճակատագրով շատ հարցերում առաջինն է եղել, էսպիսի մանրուքներում կարող է ասել նվիրում եմ ձեզ», -հավելեց ԱԻՄ առաջնորդը:

Նշենք, որ Օհանյան-Օսկանյան-Դալլաքյան-Սարգսյան դաշինքը առայժմ անվանում չունի և ավելի վաղ Օսկանյանը հայտարարել էր, որ իրենք պատրաստ են ընդունել այն կուսակցություններին, ովքեր կցանկանան համագործակցել իրենց հետ: Նա նաև հնարավոր էր համարել, որ դաշինքի ցուցակը ղեկավարի պաշտպանությաննախկին նախարար Սեյրան Օհանյանը: