Ձեր վստահելի աղբյուրը

Բազմաթիվ քաղաքացիների փորձաքննության իրավունքի իրացումն ապահովելու և այս ընթացքում կուտակումները նվազեցնելու համար,  որոշակի ճշգրտված ձևաչափով, հունվարի 23-ից մարտի 20-ը  կիրականացվի   քաղաքացիների բժշկասոցիալական  փորձաքննություն: Այս մասին նշել է աշխատանքի և սոցիալական հարցերի նախարար Արտեմ Ասատրյանն՝ այսօր Բժշկասոցիալական փորձաքննության համար պատասխանատու՝ նախարարության, գործակալության կենտրոնական ապարատի և տարածքային բաժինների ներկայացուցիչների հետ հանդիպման ժամանակ:

«Անցումային փուլում 27 տարածքայիններից կձևավորվեն 18-ը` վերանայելով սպասարկման տարածքները, մասնագիտական կազմը, փորձաքննությունների  ժամանակացույցը: Յուրաքանչյուր հանձնաժողովի գործունեության համար վերադաս մարմնից կնշանակվեն  պատասխանատուներ, ովքեր հանձնաժողովի յուրաքանչյուր անդամի հետ միասին անձնական պատասխանատվություն կկրեն յուրաքանչյուր կայացված որոշման համար»,- հայտնել է  նախարարը:

Նախարարության մամուլի ծառայությունից հայտնում են, որ անդրադառնալով փորձաքննության ընթացքին, նախարարը տարածքային բաժինների ներկայացուցիչներին կոչ է արել խստորեն կիրառել սահմանված չափորոշիչները  և քաղաքացիներին  հանգամանալից բացատրել ընդունված որոշման օբյեկտիվ հիմքերը՝ միաժամանակ ապահովելով քաղաքացու կարգավիճակին համապատասխան ծառայությունների տրամադրումը:

«Մենք անցում ենք կատարում հաշմանդամության սոցիալական մոդելին, որտեղ բացառվում է հաշմանդամության կարգավիճակ ունեցող անձին «ամեն ինչ», իսկ  համապատասխան կարգավիճակ չունեցողին՝ «ոչինչ» սկզբունքը: Յուրաքանչյուր քաղաքացի, իր կարիքին համապատասխան, ստանալու է ծառայությունների փաթեթ, որն էլ  հանդիսանալու է  կոռուպցիոն դրսևորումները հնարավորինս բացառելուն ուղղված հիմնական քայլերից մեկը»,- ասել է նախարարը՝ միաժամանակ կարևորելով, որ հաշմանդամության  սահմանման ողջ գործընթացում հստակ պետք է տարանջատվի  «հաշմանդամություն ունենալն»  ու  «հիվանդ լինելը»:

Հանդիպման ընթացքում ոլորտը  համակարգող նախարարի տեղակալին և մյուս պատասխանատուներին տրվել  է խիստ հանձնարարական՝ գործընթացը վերցնել ամենօրյա հսկողության տակ և շաբաթը մեկ անգամ զեկուցել աշխատանքների ընթացքի, խնդիրների և դրանց լուծման արդյունքների մասին: