ԵԽԽՎ-ն կքննարկի Եվրոպայում մամուլի ազատության վերաբերյալ զեկույցը
Այսօր Եվրոպայի խորհրդի խորհրդարանական վեհաժողովում քննարկվելու է «Լրագրողների նկատմամբ հարձակումներն ու մամուլի ազատությունը Եվրոպայում» զեկույցը, որի զեկուցողն է ուկրաինացի պատգամավոր Վոլոդիմիր Արիևը։
Զեկույցը պատրաստվել է ԵԽ-ում 2015թ․-ի ապրիլին ստեղծված «Լրագրության պաշտպանության և լրագրողների անվտանգության խթանման պլատֆորմի» գործունեության հիման վրա։
«Ազատ արտահայտման և լրատվամիջոցների միջոցով տեղեկություն ստանալը անհրաժեշտ պահանջ է ժողովրդավարական հասարակության համար։ Ուստի, ԵԽԽՎ-ն ողջունում է Պլատֆորմի հաստատումը, որը լրագրության պաշտպանության և լրագրողների անվտանգության խթանման հարթակ է։ Դժբախտաբար, այս գործիքի արդիականությունն արդեն իսկ հաստատվել է մի շարք դեպքերում»,-ասվում է զեկույցում։
Զեկույցում Վոլոդիմիր Արիևը ողջունում է, մասնավորապես, Ադրբեջանում Խադիջա Իսմայիլովայի ազատ արձակումը։
Արիևը անդրադառնում է մամուլի ազատության հարցերին հակամարտության գոտիներում։
«ԵԽԽՎ-ն խոր մտահոգությամբ նշում է, որ Մարդու իրավունքների եվրոպական կոնվենցիայի 10-րդ հոդվածով նախատեսված լրատվամիջոցների ազատությունը բացակայում է նաև անդամ երկրների այն տարածքներում, որոնք դե-ֆակտո վերահսկվում են անջատողական ռեժիմների կողմից՝ մասնավորապես Ադրբեջանում՝ Լեռնային Ղարաբաղում, Վրաստանում՝ Աբխազիայում ու Հարավային Օսեթիայում, ու Մոլդովայում՝ Մերձդնեստրում»,-ասվում է զեկույցում։
Այս դրույթի հետ կապված ներկայացվել է 3 փոփոխություն, որոնցով առաջարկվում է վերոնշյալ անունները փոխարինել «հակամարտության գոտիներով»։
Զեկույցում բավական հանգամանալից անդրադարձ է կատարվում ռուս-ուկրաինական հակամարտության ընթացքում մամուլի ու լրագրողների խնդիրներին, կոչ անում ՌԴ-ին անհապաղ Ուկրաինային հանձնել ռեժիսոր Օլեգ Սենցովին, ով ՌԴ-ում դատապարտվել է 20 տարվա ազատազրկման։
Զեկույցում ԵԽԽՎ-ն մտահոգություն է հայտնում 2015թ․-ից ի վեր ԵԽ անդամ երկրներում 16 լրագրողների սպանվելու հետ կապված, որոնք ամբողջությամբ չեն հետաքննվել։ Վեհաժողովը կոչ է անում անդամ երկրներին՝ մանրամասնորեն հետաքննել Ադրբեջանում Էլմար Հուսեյնովի ու Ռաֆիկ Թագիի մահվան հանգամանքները, Թուրքիայում՝ Հրանտ Դինքի, ՌԴ-ում՝ Պոլ Կլեբնիկովի ու Աննա Պոլիտկովսկայայի, Սերբիայում՝ Դադա Վույասինովիչի ու Միլան Պանտիչի, Ուկրաինայում Գեորգի Գոնգաձեի ու Վասիլ Կլեմենտիևի, ինչպես նաև Մեծ Բրիտանիայում Մարտին Օ՛Հագանի մահվան հանգամանքները։
Անդրադառնալով Թուրքիային՝ զեկույցում ԵԽԽՎ-ն մտահոգություն է հայտնում երկրում արտակարգ իրավիճակի պայմաններում լրատվամիջոցների ու լրագրողների դրամատիկ վիճակի հետ կապված՝ հատկապես լրատվամիջոցների ակտիվների առգրավում, գրողների, լրագրողների, խմբագիրների ձերբակալություններ ու կոչ է անում Թուրքիային ազատ արձակել բոլոր լրագրողներին, ովքեր չեն մեղադրվում ահաբեկչական գործողությունների մեջ։
Զեկույցի վերաբերյալ առաջարկված փոփոխությունները քվեարկության կդրվեն զեկույցի քննարկումից հետո, որից հետո արդեն՝ զեկույցն ամբողջությամբ։
Հարակից հրապարակումներ`
Լրահոս
Տեսանյութեր
Թալանում ու թալանում են , խաբելով, ստով ո՞ւմ փորն է կշտանում. Քաղաքացիները՝ թանկացումների մասին
