Ապակե ժայռը. Գլեդիս Բերեջիկլյանը վերջին կանանցից մեկն է, ով պաշտոնավարում է ճգնաժամի պայմաններում
Այս շաբաթ Նոր Հարավային Ուելս նահանգը ունեցավ նոր վարչապետ. Ստանձնելով Լիբերալ կուսակցության ղեկավարի պաշտոնը և Մայք Բերդից վերցնելով իշխանությունը՝ Գլեդիս Բերեջիկլյանը կդառնա երկրորդ կինը, ով կղեկավարի Ավստրալիայի ամենամեծ նահանգը: Այս մասին ABC News լրատվական կայքում հրապարակված հոդվածում գրում է լրագրող Ալանա Չետզերը՝ անդրադառնալով հայ Գլեդիս Բերեջիկլյանի՝ Ավստրալիայի Նոր Հարավային Ուելս նահանգի վարչապետի պաշտոնը ստանձնելուն:
Հեղինակը նշում է, որ սա կարևոր իրադարձություն է նրանց համար, ովքեր պայքարում են գենդերային հավասարության համար, սակայն նրա՝ վարչապետի պաշտոնին ընտրվելը իր մութ կողմերն ունի, հաշվի առնելով այն փաստը թե ինչպես է լինում, որ ծանր պայմաններում գտնվող նահանգի կառավարման բեռը ընկնում է կնոջ, այլ ոչ թե տղամարդում ուսերին:
Կատարված ուսումնասիրությունը և պատմական օրինակները ցույց են տալիս, որ երբ երկրի ղեկավարությունը կամ ձեռնարկությունները հայտնվում են ծանր պայմաններում, նրանք ղեկավարությունը վստահում են կնոջը կամ այլ փոքրամասնության ներկայացուցիչներին:
Հեղինակը նշում է, որ ԱՄՆ-ում կատարված հետազոտությունը ցույց է տվել, որ սևամորթները ավելի հաճախ են ղեկավարման առաջարկներ ստացել ընկերություններից այն ժամանակ, երբ դրանք ճգնաժամային պայմաններում են գտնվել:
Այս երևույթը հեղինակը համեմատում է ապակե ժայռը քանդելու հետ, որը տեղի է ունենում այն ժամանակ, երբ կինը նման պայմաններում իշխանության գլուխ է անցնում:
«Եվ նման անկայուն ժամանակներում կանանց՝ ղեկավար պաշտոն ստանձնելը ցույց է տալիս, որ նրանք գալիս են ստեղծված խառնաշփոթը վերացնելու համար և որը շատ հաճախ նրանց չի հաջողվում»,- գրում է հեղինակը:
Լրագրողը ներկայացնում է այլ հայտնի կանանց օրինկները, ովքեր ղեկավար պաշտոն են ստանձնել նմանատիպ պայմաններում. Թերեզա Մեյ, Ջուլիա Գիլարդ, Մարիսա Մայեր, և այլք:
«Այն փաստը որ մինչ այժմ կանայք ոչ հաճախ են ղեկավար պաշտոններ զբաղեցնում, ցույց է տալիս, որ նրանք հազվադեպ են հաջողության հասնում երբ կան այլ տարբերակներ, որոնք համապատասխանում են ղեկավարի՝ պատմականորեն ընդունված կերպարին. հարուստ, քրիստոնյա, սպիտակամորթ տղամարդ:
Ի հեճուկս այն բոլոր պնդումներին, թե սեքսիզմը վերացել է, և կինն ու տղամարդը հավասար հնարավորություններ ունեն այժմ, իշխանության ղեկը ստանձնած կինը շարունակում է լինել բացահայտ սեքսիզմի օրինակ: Վարչապետ ընտրվելուց հետո առաջին մամլո ասուլիսի ժամանակ Գլեդիսին հարցրեցին, թե արդյոք նա մտածել էր, որ իր ընտրվելու հավանականությունը քիչ է, քանի որ նա ամուսնացած չէ և երեխաներ չունի:
Տղամարդկանց նման հարցեր պարզապես չեն տալիս, ոչ էլ նույնիսկ լրագրողների կամ հասարակության մտքով անցնում է մտածել այդ մասին»,- գրում է Ալանա Չետզերը:
Հեղինակը ավելացնում է, որ եթե կանայք շարունակվեն համարվել ռիսկային տարբերակներ այն ժամանակ երբ երկրում ճգնաժամային պայմաններ են, ապա հասարակությունը կդիմի կանանց ղեկավարման ներուժի օգնությանը միայն այն ժամանակ երբ «հավաքարարի» կարիք լինի:
