Ձեր վստահելի աղբյուրը

«Վերջապես Միջերկրական ծովի շրջաններից առաջիկա օրերին մեր երկրի տարածքին կմոտենա բավականին հզոր ցիկլոն, այսօր առավոտյան դրա ազդեցությունը հանրապետությունում արդեն զգացվել է ջերմաստիճանի բարձրացմամբ, որը սակայն Արարատյան դաշտ դեռ չի հասել»,-լրագրողների հետ հանդիպմանը հայտնեց ՀՀ ԱԻՆ Հիդրոմետ ծառայության օդերևութաբանության կենտրոնի պետ Գագիկ Սուրենյանը:

Նրա տեղեկացմամբ՝ ներկա պահին հանրապետության բոլոր շրջաններում, բացառությամբ Արարատյան դաշտի և Երևանի, օդի ջերմաստիճանը երեկվա նույն ժամի  համեմատ բարձրացել է մոտ 10-ից 15 աստիճանով. «Ուժեղ տաք օդի ներհոսք կա հանրապետությունում, այնքան ակտիվ է, որ Իջևանի, Գորիսի հատվածում գիշերը բացասական ջերմաստիճան չի եղել, +4, 5  աստիճան է եղել նույնիսկ գիշերային ժամերին, իսկ առավոտյան արդեն +10 է եղել: Եթե երեկ Աշոցքում ժամը 10-ին -28 աստիճան էր, ապա այսօր նույն ժամին -14 էր»:

Սուրենյանի խոսքով՝ այսօր կեսօրից հետո արդեն հանրապետությունը կզգա այդ միջերկածովյան ցիկլոնի ազդեցությունը. «Կեսօրից հետո և ամսի 26-ին մենք կգտնվենք նրա ծայրամասերում, այսինքն թույլ հատվածներում: Կեսօրից հետո հանրապետության արևմտյան թևում կսկսվի ձյուն, մասնավորապես Շիրակում, Արագածոտնում, Կոտայքում, Արարատում, Վայոց Ձորում և Երևանում, այն կշարունակվի նաև հունվարի 26-ին: Բայց քանի որ մենք այսօր և վաղը գտնվելու ենք նրա ծայրամասերում, տեղումների ինտենսիվությունը մեծ չի լինի, կլինի թույլ և միջին: Հունվարի 26-ի լույս 27-ի գիշերը կմոտենա ցիկլոնի կենտրոնը, որն իր գոտու մեջ կընդգրկի ամբողջ Կովկասը: Հունվարի 27-28-ին հանրապետությունը գտնվելու է այդ ակտիվ ցիկլոնի ազդեցության գոտում, բոլոր շրջաններում համատարած ժամանակ առ ժամանակ կտեղա ձյուն, լեռնային շրջաններում այն կուղեկցվի բքով ու քամու ուժգնացմամբ, ցածր հորիզոնական տեսանելիությամբ, ճանապարհները կպատվեն մերկասառույցով»:

ԱԻՆ Հիդրոմետ ծառայության օդերևութաբանության կենտրոնի պետն ասաց, որ հունվարի 29-ի գիշերը ձյան տեղումները կպահպանվեն, իսկ առավոտյան ժամերից արդեն ցիկլոնը կսկսի ուժը կորցնել և տեղումների ինտենսիվությունը կփոքրանա, իսկ ամսի 30-ին այն դուրս կգա հանրապետության տարածքից:

Ջերմային ֆոնի փոփոխություններին անդրադառնալով, նա նշեց, որ այն գիշերային ժամերին առավել կակտիվանա և հանրապետության բոլոր մարզերում, նաև Արարատյան դաշտում և Երևանում օդի ջերմաստիճանը հատկապես գիշերային ժամերին հունվարի 26-27 ընկած ժամանակահատվածում ևս 8-10 աստիճանով կբարձրանա. «Այսինքն եթե այս օրերին մայրաքաղաքում և Արարատյան դաշտում գիշերային ժամերին միջինը մոտ -13, -15 աստիճան էր, արդեն այսօր գիշերը կլինի -6, -8 աստիճան, իսկ 27-ի գիշերը -5, -7 աստիճան, իսկ ցերեկային ժամերին ջերմաստիճանը հիմնականում կլինի -2-ից -4, որը նորմայի սահմաններում է»:

Սուրենյանն առաձնացրեց այն շրջանները, որոնք հունվարի 27-28-ին կլինեն ցիկլոնի հիմնական հարվածի տակ, որտեղ էլ կլինեն ամենաառատ տեղումները: Դրանք են Արագածոտնի լեռնային շրջանները՝ Ապարանն իր հարակից տարածքներով, Կոտայքը՝ Հրազդան, Հանքավան, Չարենցավան, Ծաղկաձոր, Արարատ, Արմավիրը, Արարատյան դաշտը և Վայոց Ձորը:

«Հունվարի 29-ից հետո, ամենայն հավանականությամբ, արև կլինի: 99 տոկոս հանավականությամբ, ցիկլոնի անցումից հետո այս չարաբաստիկ մառախուղը դուրս կգա Արարատյան դաշտի տարածքից: Այս օրերին, երբ ձյուն կտեղա, մառախուղ չի լինի, ամպամածություն կլինի, բայց դա կլինի ուղղակի ցիլկլոնի ազդեցությունը, մառախուղի հետ կապ չի ունենա»,-ընդգծեց նա:

Մասնագետի փոխանցմամբ՝ այս երեք օրերի ընթացքում տեղումների քանակը կկազմի նորմայի կրկնակին:

Ամփոփելով՝ Գագիկ Սուրենյանն ասաց, որ այս տարին այն հազվագյուտներից մեկն էր, որ  մառախուղի տևողությունը հասավ մինչև 40 օրի. «Հարյուր տարվա մեջ հինգ անգամ է, որ այսպես է եղել 1932, 1953, 1964, 1972 և 2013 թվականներին: Հունվարի սկզբին հայկական լեռնաշխարհի վրա ձևավորվեց անտիցիկլոն, դարձավ օդային պատնեշ, որն արգելք հանդիսացավ բոլոր տաք հոսանքների և տեղումնաբեր օդային զանգվածների ներհոսքին դեպի հանրապետություն, ինչի արդյունքում Արարատյան դաշտում, նրա նախալեռնային գոտիներում գրանցվեց մառախուղ, սառնամանիքային եղանակներ: Հունվար ամսվա ընթացքում մենք ունեցել ենք բազմաթիվ տաք օդի ալիքներ, որոնք բնավ չեն անդրադարձել Արարտյան դաշտին, բայց հանրապետության շրջաններում բերել են կտրուկ ջերմաստիճանի բարձրացումներ:

Ունեցել ենք օրեր, երբ Սյունիքի հովտային գոտում, Կապան-Ագարակ հատվածում օդի ջերմաստիճանը հասել է մինչև +17 աստճանի, Տավուշում՝ Իջևան, Բերդ, Բագրատաշեն հատվածներում մինչև +15 աստիճանի, բայց քանի որ Արարատյան դաշտը գտնվում էր այդ լճացած սառը օդի մեջ, այն որևէ կերպ չի արձագանքել տաք օդային հոսանքների ներթափանցմանը»:

Սուրենյանն ավելացրեց, որ Արարատյան դաշտում այս ձմեռն արձանագրել որպես խիստ ցուրտ սխալ կլինի, քանի որ խիստ ցուրտ է համարվում, երբ որ օդի ջերմաստիճանը ամսվա ընթացքում տատանվում է -25-25, իսկ առանձին օրերին մինչև -30 աստիճանի սահմաններում: Իսկ հունվարի 1-ից մինչև օրս, ամենացածր ջերմաստիճանը որ Երևանում և Արարատյան դաշտում գրանցվել է, եղել է -18 աստիճան, այն էլ մեկ օր, իսկ մնացած բոլոր օրերին գիշերային ջերմաստիճանը տատանվել է -12-ից -13-ի սահմաններում:

«Կան երկու տարբեր գործոններ՝ ջերմաստիճան և զգացողական ջերմաստիճան: Զգացողական ջերմաստիճանը կախված է օդի խոնավությունից, բարձր խոնավության դեպքում ջերմաստիճանը 4-5 աստիճանով ավելի ցուրտ է ընկալվում, քան փաստացի ջերմաստիճանը, այսինքն -12-ը հարյուր տոկոս հարաբերական խոնավության և մառախուղի դեպքում կարող է ընկալվել մինչև -17, 18 աստիճան: Մյուս գործոնն արևի լույսի բացակայությունն է, որը մարդկանց մոտ առաջացնում է հոգեբանական սթրես ու տրամադրության անկում, սրանով է պայմանավորված, որ ազգաբնակչությունն անընդհատ բողոքում է ուժեղ ցրտերից»,-ամփոփեց նա: