Ձեր վստահելի աղբյուրը

««Ազատ դեմոկրատներ» կուսակցությունը մասնակցելու է սեփական ցուցակով, որը ներառելու է մեզ գաղափարակից, մեր արժեհամակարգը կիսող ու համատեղ ճանապարհ անցած հասարակական, քաղաքական գործիչներ», -այսօր լրագրողների հետ հանդիպմանը հայտարարեց «Ազատ դեմոկրատներ» կուսակցության վարչության անդամ Նարեկ Այվազյանը:

Նրա խոսքով, լինելու են ազատական գաղափարներով մարդիկ, ովքեր իրենց ներդրումն են ունեցել Հայաստանի զարգացման բոլոր փուլերում:

Նաև ասաց, որ քանի դեռ պաշտոնական որոշում վարչությունը չի կայացրեց, անուններ չի կարող մատնանշել:

Հարցին, թե իրականությանը համապատասխանո՞ւմ են տեղեկությունները, որ «Ազատ դեմոկրատներ»-ին են միանալու նաև Անահիտ Բախշյանը, Հրանտ Բագրատյանը, Ստյոպա Սաֆարյանը, Այվազյանը պատասխանեց.

«Բազմաթիվ անուններ են շրջանառվում, բայց ամեն դեպքում, մինչև պաշտոնական որոշում չկայացվի, չեմ կարող ասել: Նաև կան կայացված որոշումներ կոնկրետ անձնավորությունների հետ կապված, բայց քանի դեռ պաշտոնապես չի հրապարակվել, զերծ կմնամ ես ինքս հրապարակել»:

Այվազյանը նշեց, որ քաղաքական դաշտում ընտրապայքարին բոլոր մասնակիցները  կլինեն իրենց մրցակիցը ու հավելեց. «Սակայն այն թևը, որը մենք ենք ներկայացնում, այդ դաշտում դեռևս չեմ կարծում, որ մեզ համար մրցակցություն կլինի»: