Ձեր վստահելի աղբյուրը

ՀՀ կառավարության այսօրվա նիստում վարչապետ Կարեն Կարապետյանի հաջորդ հանձնարարականն ուղղված էր գյուղատնտեսության նախարարությանը: Մասնավորապես, պետք է հանդիպել ՌԴ-ում և այլ երկրներում գյուղտեխնիկա արտադրող ընկերությունների ներկայացուցիչների հետ՝ տեխնիկայի մատակարարման պայմանները քննարկելու նպատակով:

«Մեկ ամսվա ընթացքում ներկայացնել Հայաստանում գյուղտեխնիկայի լիզինգի աջակցության ծրագրի նախագիծ: Պարոն Առաքելյան, «Ռոսսելմաշ»-ի հետ ե՞րբ եք հանդիպում»,- գյուղնախարարին հարցրեց վարչապետը:

Գյուղատնտեսության նախարար Իգնատի Առաքելյանն ասաց, որ այսօր կհանդիպեն, իսկ վաղը պաշտոնական այց կլինի մնացած ընկերություններ:

«Շատ ինտենսիվ, կպած անում եք»,- արձագանքեց Կարեն Կարապետյանը:

Նշվեց նաև, որ Կառավարության ծրագրով նախատեսված է մշակել բնակլիմայական աղետների կանխարգելման հայեցակարգ:

«Հանձնարարում եմ, որ հայեցակարգի շրջանակներում անդրադարձ կատարվի նաև ամպացրող թնդանոթների և կարկտապաշտպան ցանցերի արդյունավետության իրացվելիությանը: Ծրագիրը պետք է մշակվի առավել խոցելի համայնքներում կարկուտի էական վնասների նվազեցման նպատակով»,- նշեց վարչապետը: