Ձեր վստահելի աղբյուրը

«Հայաստանի զարգացման նախաձեռնություններ» (IDeA) հիմնադրամի «Աջակցություն սիրիահայերին» նախաձեռնության շրջանակում այսօր Երևանում տեղի է ունեցել Հայաստան տեղափոխված սիրիահայերի ինտեգրմանն ու նրանց կարիքների գնահատմանը նվիրված հանդիպում:

IDeA հիմնադրամի, «Վերադարձ Հայաստան» (Repat Armenia) հիմնադրամի, «Առաքելություն Հայաստան» կազմակերպության և Հայկական Բարեգործական Ընդհանուր Միության աջակցությամբ կազմակերպված համատեղ հանդիպմանը մասնակցել են ավելի քան 50 սիրիահայեր, որոնցից 16-ը Հայաստան են տեղափոխվել IDeA հիմնադրամի նախաձեռնության շրջանակներում: 

«Սիրիահայերի համար շատ կարևոր է հաղթահարել ինտեգրման հետ կապված հոգեբանական դժվարությունները: Այդ պատճառով մենք որոշեցինք փորձի փոխանակում կազմակերպել Հայաստան վերջերս տեղափոխված և ավելի վաղ հայրենադարձված սիրիահայերի միջև: Մեր կազմակերպությունն անհատապես աշխատում է Սիրիայից Հայաստան տեղափոխված յուրաքանչյուր ընտանիքի հետ՝ տրամադրելով անհրաժեշտ խորհրդատվություն և աջակցելով նրանց ինտեգրման ու աշխատանքի տեղավորման գործում», - ասել  «Վերադարձ Հայաստան» հիմնադրամի ղեկավար Վարդան Մարաշլյանը։

Սիրիահայերին աշխատանքով ապահովելու նպատակով հանդիպմանը հրավիրած են եղել նաև հայաստանյան մի շարք ընկերությունների և կազմակերպությունների ներկայացուցիչներ, ովքեր ներկայացրել են իրենց կազմակերպություններում առկա թափուր աշխատատեղերը: