Ձեր վստահելի աղբյուրը

Այսօր մարվել և «Հայփոստի» ՓԲԸ-ի կողմից շրջանառության մեջ են դրվել երկու նամականիշ՝ նվիրված «Հայկական  բանակի կազմավորման 25–ամյակը» թեմային:

«Հայփոստի»-ի հասարակայնության հետ կապերի ծառայությունից հայտնում են, որ երկու նամականիշերից մեկի վրա պատկերված են ՀՀ զինված ուժերի զորքերի որոշ տեսակները, իսկ մյուս նամականիշի վրա պատկերված է հայ զինվորների շարքը՝ ծածանվող ՀՀ եռագույն դրոշի համադրությամբ: Երկու նամականիշերի վրա պատկերված է ՀՀ զինված ուժերի զինանշանը: Նամականիշերի հեղինակն է «Հայփոստ» ՓԲԸ-ի դիզայներ Վահագն Մկրտչյանը: 

Նամականիշերի մարումն իրականացրել են ՀՀ պաշտպանության նախարար Վիգեն Սարգսյանը, ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, «ՀայՓոստ Թրասթ Մենեջմենթի» գլխավոր տնօրեն Խուան Պաբլո Գեչիջյանը և Երկրորդ աստիճանի Մարտական խաչի ասպետ, շարքային զինծառայող Նարեկ Մալխասյանը:

««Հայփոստ» ՓԲԸ-ն միշտ հատուկ ուշադրության է արժանացնում Հայաստանի Հանրապետության պետական հոբելյաններն ու տոները՝ թողարկելով նամականիշեր, որոնք կրում են մեր երկրի յուրօրինակ ուղերձը՝ հայկական մշակույթը տանելով աշխարհի տարբեր ծայրեր»,-ասված է ընկերության հաղորդագրությունում:

Թողարկման օրը` 27 հունվարի 2017թ.
Դիզայնը՝ Վահագն Մկրտչյան
Տպարանը` Cartor, Ֆրանսիա
Չափսերը` 40,0 x 30,0 մմ
Տպաքանակը՝ 40 000 հ. x 2