Ձեր վստահելի աղբյուրը

«Ես այն քաղաքական գործիչն են, որը ողջունել է Գագիկ Ծառուկյանի վերադարձը քաղաքականություն և ընդգծել, որ նա լուրջ անելիքներ ունի մեր երկրի ու ժողովրդի համար», -այսօր լրագրողների հետ ճեպազրույցում հայտարարեց «Երրորդ հանրապետություն» կուսակցությաննախագահ Վիկտոր Դալլաքյանը։

Նա լրագրողներին տեղեկացրեց, որ դեռ 2003 թվականից ինքը ջերմ հարաբերություններ ունի Ծառուկյանի հետ ու պարբերաբար հանդիպել են։ Ասաց նաև որ ուրախ է, որ այդ հանդիպումները շարունակվում են այս ժամանակահատվածում։

«Եթե թույլ տաք, ես ավելի մանրամասներ չեմ ներկայացնի, բայց կարող եմ ասել, որ այդ հանդիպումները և իմ, և պարոն Ծառուկյանի միջև շատ արդյունավետ են», -հավելեց Դալլաքյանը։

Ինչ վերաբերում է Ծառուկյանի կողմից ստեղծվելիք դաշինքին միավորվելուն, Դալլաքյանն ասաց. «Եթե ՀՀ-ում ստեղծվի մի այնպիսի իրավիճակ, որը կրկնի 1999 թվականի «Միասնություն» դաշինքի նախադեպը, երբ խորհրդարանական ընտրությունների արդյունքում գործող նախագահի (Ռոբերտ Քոչարյան) պարագայում «Միասնություն» դաշինքը տպավորիչ հաղթանակ տարավ խորհրդարանական ընտրությունների ժամանակ։ Ես այսօր ևս տեսնում եմ նման հնարավորություն, իսկ մանրմանսերի մասին որոշ ժամանակ հետո ես ձեզ կներկայացնեմ։ Թույլ տվեք փակագծեր չբացեմ»։

Լրագրողների խնդրանքով Դալլաքյանն անդրադարձավ նաև Սերժ Սարգսյանի երեկվա հայտարարության այն հատվածին, որ ինքը չի ողջունել Գագիկ Ծառուկյանի մուտքը քաղաքականություն. «Աշխարհում դժվար թե գտնվի մի երկիր, որի նախագահը գնահատական տա որևէ քաղաքական գործչի քաղաքականությամբ զբաղվելու իրավունքի իրացմանը։ Դա բնորոշ է միայն բռնապետական երկրներին»