Ձեր վստահելի աղբյուրը

«Բացառված է: Խոսել այն մասին, որ Վրաստանը կարող է դադարեցնել Հայաստանին գազի մատակարարումը, շահավետ է նրանց համար, ովքեր ցանկանում են սեպ խրել մեր հարաբերություններում»: Այդ մասին հայտարարել է Վրաստանի նախագահի՝ արտաքին հարաբերությունների հարցերով խորհրդական Թենգիզ Փալաձեն «Грузия Online»-ի հետ հարցազրույցում:

«Վրաստանը վստահելի գործընկեր է, և մեկ անգամ չէ, որ դա ապացուցել ենք: Վրաստանը չի պատրաստվում դադարեցնել Հայաստանին գազի մատակարարումը: Մենք խոսում ենք միայն տրանզիտի պայմանների մասին ու նման բանակցություններում մեր ընդդիմախոսը հանդիսանում է Ռուսաստանը: Խոսքը բոլորովին այլ բանի մասին է, փոխվել են պայմանագրի պայմանները, բայց ոչ Վրաստանի օգտին»,-ասել  է նա:

Գեորգի Մարգելաշվիլիի խորհրդականն ասել է, որ նույնիսկ 2008-ին վրաց-ռուսական պատերազմի ժամանակ, «երբ Ռուսաստանը ռմբակոծում էր Վրաստանը, և մենք Ռուսաստանի ագրեսիայի զոհ էինք, մեր կողմից ոչ մի վայրկյան չի դադարեցվել տարանցիկ պարտավորությունների կատարումը, այդ թվում ագրեսոր Ռուսաստանի նկատմամբ:  Եթե հիշում եք Հայաստան գազամատակարարումը դադարեցվեց 2006-ին, երբ Ռուսաստանի տարածքում գազամուղ էր պայթեցվել, այդ ժամանակ Վրաստանն էլ մնաց առանց գազի, բայց դա ՌԴ պատասխանատվության հարց էր, ոչ թե մեր»:

Հիշեցնենք, որ Վրաստանի կառավարության ու «Գազպրոմ» ռուսական ընկերության միջև ռուսական գազը Վրաստանի տարածքով Հայաստանին մատակարարելու պայմանների վերաբերյալ կնքված համաձայնագիրը դժգոհության ալիք էր բարձրացրել հարևան երկրում: Դրան դեմ էին արտահայտվել ու փաստաթղթի հրապարակման կոչով հանդես եկել ՀԿ-ների, քաղաքական ուժերի ներկայացուցիչներ, ինչպես նաև Վրաստանի նախագահը:

Թենգիզ Փալաձեն նշել  է, որ դա երկու ընկերությունների միջև ստորագրված սովորական փաստաթուղթ չէ, այստեղ  ավելի շատ քաղաքականություն է, քան էներգետիկա:

«Ցավոք, մենք ունենք այն, ինչ ունենք: Նախագահն այսօր դիմել է խորհրդարանին, որը սահմանադրության համաձայն, կառավարության նկատմամբ վերահսկողություն է իրականացնում: Տեսնենք, ինչպես կզարգանան իրադարձությունները»,-ասել է նա: