Ձեր վստահելի աղբյուրը

Բուժծառայության ավագ լեյտենանտ Արա Միրաքյանն ապրիլյան պատերազմի օրերին եղել է առաջնագծում, ինտենսիվ  կրակի  տակ մարտադաշտից դուրս բերել մարտական գործողություններին մասնակցող վիրավոր զինծառայողների, ցուցաբերել բուժօգնություն և փրկել շատերի կյանքը: Բանակի կազմավորման 25-րդ տարեդարձի առթիվ, ծառայողական պարտականությունները կատարելիս ցուցաբերած անձնվիրության և մասնագիտական արդյունավետ գործունեության համար թիվ N զորամասի բուժկետի պետ, բժշկական ծառայության ավագ լեյտենանտ Արա Միրաքյանը  պարգևատրվեց  Մարտական ծառայության մեդալով:

Նախագահական նստավայրում պարգևը ստանալուց հետո լրագրողների հետ զրույցում նա չցանկացավ հիշել այդ օրերը. «Ես որ հիշում եմ, դեպրեսիա է սկսվում մոտս: Արյունալի, վախենալու տեսարան էր, ինձ մի քանի օր հանգիստ չի տվել: Պատերազմը ստիպեց, որ թուրքին ավելի շատ ատեմ»:

Բժշկի խոսքով, աշխատելու պահին ոչնչից չես վախենում, չես զգում, որ մահը կողքիդ է:
«Երբ  վերադառնում ես բուժկետ, նոր զգում ես՝ որտեղ էիր, որտեղից եկար: Միշտ մտածում ես, որ կարող էիր հինգ րոպե շուտ գնալ, ավելին կարող էիր անել»,- ասաց  ավագ լեյտենանտ  Միրաքյանը:

Հարցին, թե ինչպե՞ս է ընտանիքը  վերաբերվում ձեր ծառայությանը, նա ասաց. «Այդ օրերին մայրս զանգել էր, հարցնում էր, թե որտեղ եմ: Ես էլ նրան հանգստացնելու համար ասացի՝ հետ եմ եկել, Մատաղիսի շրջանում եմ, առաջնագիծ չեմ գնացել, բայց իրականում այդ պահին առաջնագծում էի: Ասում է՝ տղաս, դու հետ գնա այնտեղ, ես էլ եմ գալիս այնտեղ, այսինքն՝ ինձ ուզում էր ոգևորել, ասում է՝ զինվոր-երեխաները մեղք են»: