Ձեր վստահելի աղբյուրը

ՀՀ ԶՈւ գլխավոր շտաբի պետ, գեներալ-լեյտենանտ Մովսես Հակոբյանը չի մեկնաբանում պաշտպանության նախկին նախարար Սեյրան Օհանյանի՝ որպես ընդդիմադիր գործիչ քաղաքականություն մուտք գործելը: Եռաբլուր զինվորական պանթեոնում նա անպատասխան թողեց լրագրողների հարցերը:

Հանրապետական խմբակցության անդամ, գեներալ Մանվել Գրիգորյանը խոստովանեց՝ զարմացած է:

«Ես, օրինակ, չէի մտածում, որ Սեյրան Օհանյանը ըտենց ակտիվ քաղաքականություն կմտնի: Որոշ բաների վրա զարմացել եմ, որովհետև ամեն ինչին չափ կա էլի, ձյունը ձյուն է մնում»,-ասաց նա:

Հիշեցրեց, որ Սեյրան Օհանայանին ճանաչում է 89 թվականից, ճանապարհ է անցել, իսկ Հովիկ Աբրահամյանի մասին խոսել չի ցանկանում:

Նախկին նախարարի հետ վերջերս չի խոսել, պաշտոնը լքելուց հետո մի երկու անգամ հանդիպել է, խոսել է, չի կարծում, որ նեղացել է:

«Ինչի՞ց պիտի նեղանար»,-ասաց նա, ավելացնելով, որ ՊՆ-ից հեռանալուց հետո ինքը չի նեղացել, այլ ձևով լծվել է բանակի զարգացմանն ուղղված գործին:

Գեներալ, պատգամավոր Սեյրան Սարոյանը չցանկացավ նման հարցերի պատասխանել, ասաց. «Էսօր պռազդնիկ է ինձ համար: Չեմ ուզում տրամադրությունս ընկնի, ձեր տրամադրությունն էլ գցեմ: Երեխեք ջան, ես արդեն կարծիքս ասել եմ նախկին նախարարի մասին, իրոք, ցավ է ինձ համար»:

Սյունիքի նախկին մարզպետ Սուրիկ Խաչատրյանը նույն թեմայի մասին խոսելիս, ասաց՝ ճիշտ չի համարում, որ  համատեղ ճանապարհ անցնելուց հետո մեղքը մեկ մարդու վրա բարդեն:

«28 տարի էդ համակարգում, էդ նավի մեջ լինի, հետո իր թերությունները վերագրի ուրիշին: Ամենքս էլ թերություն ունենք»,-ասաց Սուրիկ Խաչատրյանը:

Նշեց, որ ինքն էլ 12 տարի մարզպետ է եղել, բայց թերությունները ոչ մեկի չի վերագրում: Պաշտոնանկությունից հետո էլ, իր խոսքով, չի նեղացել:

«Բոլորս էլ գիտենք, որ էդ պաշտոնը հավերժ չի: Էսօր կարող է աշխատես, վաղը կարող է չաշխատես: Ցանկացած մարդ ինքն է իր ճակատագիրն ընտրում, բայց նաև լավ կլիներ այդ ճանապարհին ուրիշներին չփնովեինք»,-ասաց նա: