Ձեր վստահելի աղբյուրը

Ապրիլյան  պատերազմի օրերին ժամկետային զինծառայող Նարեկ Մալխասյանը, ով հակատանկային նռնականետով  խոցել էր ԼՂՀ տարածք (Ջաբրայիլի ուղղությամբ) ներխուժած  ադրբեջանական ուղղաթիռը,  այսօր արդեն պայմանագրային զինծառայող է:

«Ապրիլյան դեպքերի ժամանակ ցանկություն առաջացավ, որ շարունակեմ ծառայել հայոց բանակին, քանի որ այդ ժամանակ շատ բան զգացի»,- Panorama.am-ի հետ զրույցում ասաց «Մարտական խաչ» 2-րդ աստիճանի շքանշանակիր Նարեկ Մալխասյանը:

Կոնկրետ  իր բացառիկ ռազմական սխրանքի մասին Նարեկն ասաց. «Ուղղակի ստացվեց: Հայտնվեցի ճիշտ պահին, ճիշտ տեղում: Իմ փոխարեն կարող էր լինել յուրաքանչյուրը: Ինձ թվում է՝ ով էլ լիներ, կփորձեր նույնն անել»:

Հարցին, թե ի՞նչ խորհուրդ կտա այն զինծառայողներին, եթե, Աստված մի արասցե, մի օր հայտնվեն նույն իրավիճակում, ինչ ինքը, պատասխանեց. «Ամենակարևորը՝ յուրաքանչյուր զինծառայող կարողանա տիրապետել իր զենքին, յուրացնի այն գիտելիքը, որը նրան տրվում է: Կարևոր է նաև ճիշտ կողմնորոշվելը: Ընդհանրապես, պահից է գալիս, թե ինչ քայլերի կդիմես»:

Նարեկ Մալխասյանը շնորհավորեց զինծառայողներին Հայոց բանակի 25-ամյակի առիթով. «Բոլոր զինծառայողներին ցանկանում եմ խաղաղ ծառայություն: Բոլորն էլ վաղ թե ուշ հասնելու են իրենց ընտանիքներին, ամենակարևորը՝ խաղաղություն լինի»:

Շարքային Իգոր Միրզախանյանի միակ ցանկությունը ևս խաղաղությունն է:

Բանակի օրվա առիթով շնորհավորելով իր ծառայակից ընկերներին, նաև նորակիչներին, Իգորն ասաց. «Գիտեմ, շատ դժվար է, խեղդում է հարազատների կարոտը, բայց հնարավոր է դիմանալ և ողջ-առողջ հասնել ծնողներին: Սկզբում, իհարկե, անսովոր է ամեն ինչ, քանի որ կտրվում ես քո առօրյա կյանքից ու մտնում լրիվ նոր աշխարհ, կյանք: Սակայն հետո բանակային կյանքն էլ է դառնում սովորական, առօրեական և հնարավոր է հաղթահարել»: