Ձեր վստահելի աղբյուրը

ՀՀ Շիրակի մարզի Աշոցքի համայնքի դպրոցի ռազմագիտության դասասենյակն այսօրվանից կոչվում է Շավարշ  Մելիքյանի անունով: 

Հիշեցնենք, որ 2016 թ. դեկտեմբերի 29-ի վաղ առավոտյան ՀՀ Տավուշի մարզի Չինարի գյուղից դեպի հարավ արևելք ընկած պետական սահմանի հատվածում, ադրբեջանական զորքերը ձեռնարկել էին դիվերսիոն ներթափանցման փորձ։  ՀՀ զինված ուժերը մարտի էին բռնվել հակառակորդի հետ՝ կասեցնելով հակառակորդի առաջխաղացումը: Ադրբեջանի դիվերսիան հետ մղելիս զոհված ավագ լեյտենանտ Շավարշ Մելիքյանը, շարքային զինծառայողներ Էրիկ Աբովյանն ու Էդգար Նարայանը:

Շիրակի մարզպետարանի պաշտոնական կայքը գրում է, որ ավագ լեյտենանտ Շավարշ  Մելիքյանի մասին Աշոցքում բոլորն են խոսում հպարտությամբ ու սիրով, մանկուց «գեներալ» մականունը ստացած երիտասարդը միշտ զինվորական կեցվածքով ու պարտաճանաչությամբ է աչքի ընկել շրջապատում:

Որդու անունը կրող դասասենյակի ժապավենը կտրել է Շավարշի հայրը՝ Մելիքսեթ Մելիքյանը: 

«Դպրոցում սովորելիս արդեն որոշեց գնալ զինվորական ուսում ստանալու, չնայած ես չէի էլ ուզում, բայց ինքն այնքան վճռական էր, որ որևէ մեկս չկարողացանք հակառակն համոզել: Գնաց, սովորեց, բարձր առաջադիմությամբ ավարտեց ու ոգևորությամբ աշխատանքի անցավ բալես....»,- արցունքն աչքերին պատմել է Շավարշի մայրը: 

«Ես այնքան հպարտություն եմ զգում, որ այժմ Շավարշի անունը կրող դասասենյակում եմ գտնվում: Շավարշն այն քչերից էր, ում համար կյանքը երկրորդական էր, հայրենիքն էր առաջինը ու նա դա ապացուցեց իր սխրանքով: Թող լույս իջնի Շավարշի շիրիմին, ծնողներին համբերություն եմ  մաղթում, իսկ մեր 25 ամյա բանակին` հաղթական ճանապարհ, խաղաղ երկինք»,- ասել է  Շիրակի մարզպետ Հովսեփ Սիմոնյանը:

Ռազմագիտության դասարանում  նաև «Փառքի անկյուն» կա, որտեղ դասակի հրամանատար Շավարշի բազմաթիվ պատվոգրերն ու շնորհակալագրերն են, նկարներն ու մեդալները: 

N զորամասի դասակի հրամանատար, ավագ լեյտենանտ Շավարշ Մելիքյանը Հայկական բանակի կազմավորման 25-րդ տարեդարձի կապակցությամբ Հայրենիքի սահմանները պաշտպանելիս ցուցաբերած անվեհերության և խիզախության, կյանքին սպառնացող վտանգի պայմաններում ծառայողական պարտքը անձնազոհաբար կատարելու համար հունվարին 28-ին հետմահու պարգևատրվեց Արիության մեդալով: 

Լուսանկարները՝ Շիրակի մարզպետարանի պաշտոնական կայքից: