Ձեր վստահելի աղբյուրը

Հունվարի 29-ին ապրիլյան պատերազմի ժամանակ Ջրակնում (Ջաբրայիլ) զոհված զինծառայող, տանկիստ Վլադիմիր Ալիխանյանը կդառնար 21  տարեկան:

Տանկիստը ծառայում էր Ֆիզուլիում: Ապրիլի 2-ին իր ընկերների հետ նա օգնության է հասել Ջաբրայիլ, ապրիլի 3-ին՝ զոհվել: Վլադիմիրի հետ նույն տանկում զոհվել են ավագ լեյտենանտ Բենիամի Եղոյանն ու ժամկետային զինծառայող Տիգրան Աբգարյանը:

Տանկիստները առաջինն են մտել մարտի դաշտ, երկու օր շարունակ հերոսաբար պայքարել են հակառակորդի դեմ՝ ոչնչացնելով  3 տանկ, 1 ՀՄՄ և մեծաթիվ գրոհայինների: Հակառակորդի արձակած հրթիռից անձնակազմը հերոսաբար զոհվել է։

Դիլիջանի Թախտա թաղամասում է անցել մերօրյա հերոս  Վլադիմիր Ալիխանյանի մանկությունը: Վլադիմիրի մայրը՝ Աննա Մուկուչյանն իր հարցազրույցներից մեկում պատմել է, որ որդին աշխատասեր էր, սիրում էր օգնել մեծերին:

«Տան հարցերն էլ էր լուծում: Փոքր ժամանակվանից էլ ասում էր՝ հույսդ ինձ վրա դիր»: Վլադիմիրը սովորել է Դիլիջանի միջնակարգ դպրոցում, ապա՝ քոլեջում: Հետո զորակոչվել է բանակ՝ 2014 թ-ին: Շատ լավ է ծառայել, շատ են սիրել իրեն: Զանգեց, ասաց՝ մամ, 78 օր է մնացել: Ասեցի՝ Վալոդիկ ջան, ես օրերը չեմ հաշվում: Մի քանի օր հետո զոհվեց»,- պատմել է մայրը:

Բենիամի Եղոյանի, Վլադիմիր Ալիխանյանի և Տիգրան Աբգարյանի  հիշատակին Արցախում խաչքար և ցայտաղբյուր է կառուցվել:

Շարքային Վլադիմիր Ալիխանյանը հետմահու պարգևատրվել է «Մարտական խաչ» առաջին աստիճանի շքանշանով, Լեռնային Ղարաբաղի հանրապետության «Արիության համար» մեդալով:

Հունվարի 29-ին մեկ այլ հերոսի, 2014-ի օգոստոսի լույս 2-ի գիշերը հակառակորդի հետախուզադիվերսիոն ներթափանցման փորձը կասեցնելիս արիաբար զոհված Զորիկ Գևորգյանի ծննդյան օրն է: Նա կդառնար 28 տարեկան: