Ձեր վստահելի աղբյուրը

«Ռուս բլոգեր Ալեքսանդր Լապշինի շուրջ ստեղծված իրավիճակը որևէ մեկի հեղինակությունը չի ավելացնի, հակառակը»,- 2016թ. դիվանագիտական տարվա ամփոփիչ ասուլիսիսում ասաց արտաքին գործերի նախարար Էդվարդ Նալբանդյանը:

Նախարարի  խոսքով, խայտառակություն է, երբ խոչընդոտում են, հետապնդում են մարդկանց հիմնարար ազատությունների, իրավունքների իրականացման հետ կապված:

«Բոլոր դեպքերում այդ խայտառակությունը որոշների ինքնության բնորոշիչ մաս է կազմում»,- հավելեց նախարարը:

Է.Նալբանդյանը չի կարծում, որ այդ դեպքը կարող է նախադեպ դառնալ. «Գնացել են, գնում են ու ավելի շատ կգնան Ղարաբաղ: Ադրբեջանի կազմած սև ցուցակում ովքեր են ընդգրկված՝ պետական, քաղաքական, հասարակական, մշակութային հեղինակավոր գործիչներ, համաշխարահային համբավ ունեցող դեմքեր: Որևէ մեկը կարո՞ղ է Ադրբեջանի հետ համագործակացել այս հարցով կամ հանձնել, խոչընդոել: Իհարկե, ոչ: Բացառություններ կարող են լինել»:

Նախարարի խոսքով, չնայած վերջին շրջանում Ադրբեջանի բոլոր վայնասուններին, ԼՂՀ ավելի ու ավելի շատ այցելուներ, զբոսաշրջիկներ են գնում, Ղարաբաղը դարձել է ձգող ուժ:

«Ինչքան խոչընդոտում են, այնքան ավելի շատ են գովազդում, ավելի շատ մարդ է ուզում գնալ ու տեսնել Ղարաբաղը: Ադրբեջանի նյարդերը տանուլ են տալիս, դրա համար էլ այդպիսի իրավիճակների մեջ են ընկնում: Կարծում եմ՝ միայն վնասում են Ադրբեջանի հեղինակությանը, նաև նրանց, ովքեր կփորձեն այսպիսի հարցերում համագործակցել Ադրբեջանի հետ»,- ասաց ՀՀ ԱԳ նախարարը:

Արցախի լուսանկարները՝ Panorama.am-ի արխիվից: