Ձեր վստահելի աղբյուրը

Գերմանիայի զարգացման վարկերի (KfW) բանկի աջակցությամբ իրականացվող Հայաստան-Վրաստան էլեկտրահաղորդման օդային գծի և ենթակայանների կառուցման ծրագրի իրականացման կապալառու կազմակերպությունների ընտրության նպատակով հայտարարված միջազգային մրցույթի հայտատուները հայտնի կդառնան փետրվարի առաջին տասնօրյակում,-այս մասին հայտնում են ՀՀ էներգետիկ ենթակառուցվածքների և բնական պաշարների նախարարության տեղեկատվության և հասարակայնության հետ կապերի բաժնից։

Նախարարության զարգացման և ներդրումային ծրագրերի վարչության պետ Հայկ Հարությունյանի խոսքով, հայտերի ներկայացման վերջնաժամկետը բարձր լարման հաստատուն հոսանքի փոխակերպիչ կայանի և ենթակայանների կառուցման համար սահմանված է 2017թ. փետրվարի 6-ին, էլեկտրահաղորդման օդային գծերի կառուցման համար՝ փետրվարի 8-ին:

Ծրագրի իրականացման նպատակն է միացնել հայկական և վրացական էլեկտրաէներգետիկական համակարգերը` վրացական սահմանին մոտ` Այրումում տեղակայվող բարձր լարման հաստատուն հոսանքի փոխակերպիչ կայանով։ Վրացական կողմից միացումը կլինի «Մառնեուլի» ենթակայանից 500 կՎ օդային գծի միջոցով: Արդյունքում` Հայաստան-Վրաստան էլեկտրաէներգիայի փոխանակման հզորությունը ներկայիս 200 ՄՎտ-ից առաջին փուլում` 2019թ. կհասցվի 350 ՄՎտ-ի։

Առաջին փուլի իրականացման նպատակով ներգրավվել են շուրջ 188 մլն եվրոյի վարկային և դրամաշնորհային միջոցներ։

Ծրագիրը կշարունակվի նաև դրանից հետո։ Երկրորդ փուլի միջոցառումների իրականացման արդյունքում Հայաստան-Վրաստան գծով էլեկտրաէներգիայի փոխանակման հզորությունը 2021թ. կհասնի 700 ՄՎտ-ի, իսկ վերջնական փուլում` ելնելով շուկայի և տարածաշրջանային համագործակցության պահանջներից՝ 1050 ՄՎտ-ի: