Ձեր վստահելի աղբյուրը

Թեոդոսիայում  հանրահայտ ծովանկարիչ Հովհաննես Այվազովսկու գերեզանի վերանորոգման համար անհրաժեշտ է 23 միլիոն ռուբլի: crimea.ria.ru-ի հաղորդմամբ,  Թեոդոսիայի վարչակազմի մշակութային հարցերի բաժնի պետ Ալբերտ Դորժեևը  նշել է, որ այս գումարը վերջնական չէ, կարող է փոփոխվել, երբ պատրաստ լինի վերականգնման  նախագիծը:

Թեոդոսիայի քաղաքային իշխանությունները նշում են, որ  այսօր գերեզմանը և այն շրջապատող տարածքն անբարեկարգ վիճակում է:

«Մենք ամեն սանտիմետր ուսումնասիրել ենք: Կան լուրջ խնդիրներ ստորգետնյա ջրերի հետ կապված, ինչ-որ տեղաշարժեր են եղել, գերեզմանը բառիս բուն իմաստով լողում է: Անհրաժեշտ է այնտեղից ջուրը  հանել և հասկանել, թե ինչ վիճակում է դամբարանը: Այնտեղ երկար տարիներ ոչ ոք չի մտել»,- ասել է Ալբերտ Դորժեևը:

Ղրիմի մշակութային հուշարձանների պահպանության կոմիտեից հայտնել են, որ գերեզմանի, ինչպես նաև Այվազովսկու  թանգարանի  վերանորոգումն  առաջնահերթ ծրագրերից է, սակայն դեռ հայտնի չէ, թե երբ կտրամադրվի  անհրաժեշտ գումար աշխատանքները սկսելու համար: 

Թեոդոսիայում գտնվող Հովհաննես Այվազովսկու  թանգարանում է պահվում նկարչի ամենամեծ հավաքածուն. 416 կտավի մեծ մասն ունի ավելի քան մեկ միլիոն եվրո ապահովագրական արժեք:

Նշենք, որ այս տարի լրանում է Հ. Այվազովսկու ծննդյան 200-ամյակը:

Հովհաննես Այվազովսկին ծնվել է 1817 թվականին  Ղրիմում՝ Թեոդոսիա քաղաքում, աղքատ հայ ընտանիքում։ Իր ընտանիքի ազգանունն Այվազյան էր։ Նկարչի նկարներից մի քանիսը կրում են այս ստորագրությունը՝ «Հովհաննես Այվազյան»: Այվազովսկու նախնիները Գալիցիայի հայերից էին, ովքեր XVII–րդ դարում Գալիցիա էին գաղթել Արևմտյան Հայաստանից։ 
Ստեղծել է 6000-ից ավելի կտավ, հիմնականում ծովանկարներ, քանզի ծովը նրա տարերքն էր, հետաքրքրությունների և բնության հանդեպ մեծ սիրո կենդանի մարմնացում: Նա չի անտեսել նաև հայրենի բնաշխարհը, հայկական թեմատիկան:  Իր հաջողակ ստեղծագործական գործունեության ընթացքում վաստակած զգալի գումարներով Այվազովսկին բացել է արվեստի դպրոց և պատկերասրահ իր հարազատ Թեոդոսիա քաղաքում։
Վախճանվել է 1900 թվականին։ Այվազովսկին թաղված է Թեոդոսիայում՝ հայոց միջնադարյան Սուրբ Սարգիս եկեղեցու բակում։ 1903 թ.նկարչի այրին մարմարե շիրմաքար է տեղադրել, որը իտալացի քանդակագործ Լ.Բիոջոլիի աշխատանքն է։ Շիրմաքարին գրաբար փորագրված են պատմահայր Մովսես Խորենացուխոսքերը. «Մահկանացու ծնեալ անմահ զիւրն յիշատակ եթող»։
Այվազովսկու գործերը աճուրդով վաճառվել են մինչև $2 միլիոն 125 հազար ամերիկյան դոլարով։
Հայ կերպարվեստում բնանկարի ժանրի հիմնադիրն է Հովհաննես Այվազովսկին: Ծովանկարիչ Հովհաննես Այվազովսկու արվեստը ժամանակի առաջադիմական գաղափարներն արտացոլող խոշոր մշակութային երևույթ է: