Մոուրինյո. «Երբեք չեմ կորցնում կապն իրականության հետ»
«Մանչեսթեր Յունայթեդի» գլխավոր մարզիչ Ժոզե Մոուրինյոն «Հալլ Սիթիի» հետ խաղին նվիրված մամուլի ասուլիսում պատասխանել է լրագրողների հարցերին։
«Խաղացողներից ոչ ոք չի հեռանա, և ոչ ոք չի գա։ Առանց այդ էլ կորցրել ենք 2 ֆուտբոլիստի։ Դուք կարող եք ասել, որ Շնայդերլինը և Մեմֆիսը լավ խաղ չէին ցուցադրում, իսկ իրականում մասնակցում էին որոշ հանդիպումների։ Երբ նրանք էին խաղում, ինչ-որ մեկը հանգստանալու հնարավորություն էր ստանում։ Երբ Մորգանը «Ֆեյենորդի», «Նորթհեմպտոնի» ու «Ֆեներբախչեի» հետ խաղերում ասպարեզ դուրս եկավ, դա նշանակում էր, որ Պոգբան, Կարրիկը կամ Էրրերան վերականգնում են ուժերը։ Հնարավոր է՝ ինչ-որ մեկին թվում է, թե այնպիսի խաղացողները, ինչպիսին Մորգանն է, հատուկ նշանակություն չունեն թիմի համար, բայց դա այդպես չէ։ Վերջնարդյունքում յուրաքանչյուր ֆուտբոլիստ մեզ համար նշանակություն ունի։ Հատկապես այն իրավիճակում, երբ դու անցնում ես շատ խիտ մրցաշրջանով՝ բազմաթիվ խաղերով։
Մեզ սպասվում են գավաթային, հետաձգված, Եվրոպայի լիգայի ու առաջնության հանդիպումներ, ուստի իրավիճակը, իրոք, ծանր է։ Առանց այդ էլ կորցրել ենք 2 ֆուտբոլիստի։ Չենք կարող այլ խաղացողների կորցնել։
Յանգը կմնա թիմում։ Նա կմասնակցի առաջիկա խաղին և մեզ հետ կլինի մինչև մրցաշրջանի ավարտը։ Ուեյն Ռունին նույնպես մնում է։
Ավելի շատ հակված ենք համալրում կատարել ամռանը։ Ինձ դուր են գալիս իմ խաղացողները, նրանց նկատմամբ առարկություններ չունեմ, բայց գիտեմ, թե ինչ եմ ուզում։ Ավելի ու ավելի լավ եմ ճանաչում իմ ֆուտբոլիստներին, իմ թիմին, սակայն նաև շատ լավ գիտեմ այս առաջնությունը, որն անընդհատ զարգացում է ապրում։
Ձմեռային տրանսֆերային պատուհանը դեռ նոր է փակվել, ուստի ոչ մի իմաստ չկա խոսել հաջորդ պատուհանի մասին։ Այնքան խաղեր, մրցաշարեր ու հիանալի ֆուտբոլիստներ ունենք։ Հիմա մեր առաջնահերթությունը դրանք են։
Արդյոք գիտե՞մ, թե ում եմ ուզում հրավիրել։ Այո, գիտեմ։ Դա ռեա՞լ է։ Միշտ աշխատում եմ իրատես լինել։ Հիշում եմ՝ մի քանի տարի առաջ խնդրեցի գնել երկրորդ դարպասապահի, և իմ տեխնիկական տնօրենն ինձ տվեց հնարավոր թեկնածուների ցուցակը, որում առաջին տեղում նշված էր Բուֆոնի անունը... Անձամբ ես երբեք չեմ կորցնում կապն իրականության հետ և ընտրում եմ այն տարբերակները, որոնք իրականում հնարավոր են։ Սակայն նման խոսակցությունների համար շատ ժամանակ կունենանք ամռանը։
«Հալլ Սիթիի» հետ գավաթային պատասխան խաղում մեզ նույնիսկ պարտությունը կբավարարեր։ Եթե զիջեինք 1 գնդակի տարբերությամբ, միևնույն է, կմտնեինք եզրափակիչ։ Իսկ առաջիկա խաղում մեզ համար միայն 3 միավորը լավ արդյունք կլինի։ Եթե չհաղթենք, իրոք, վատ կլինի, որովհետև հիմա մեզ հաղթանակները շատ են անհրաժեշտ։ Դրանում է այս հանդիպումների տարբերությունը։ Հիմա մեզ, բացի հաղթանակից, ոչ մի արդյունք չի բավարարում»,- Մոուրինյոյի խոսքերը մեջբերել է manutd.ru-ն։
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
