Ձեր վստահելի աղբյուրը

Այսօր Արևիկ գյուղում հպարտության ու նաև լացի օր էր. ապրիլյան պատերազմի հերոս Սևակ Խաչատրյանը կդառնար 20 տարեկան։ Գյուղի դպրոցում Սևակի մտերիմներն էին, մանկության ու ծառայակից ընկերները, նրան դասավանդած ուսուցիչներն ու բանակային օրերի հրամանատարը։ Բոլորն էլ հպարտ էին Սևակին ճանաչելու համար։

Ապրիլյան պատերազմում ցուցաբերած արիության ու գերազանց ծառայության համար Սևակը շքանշան էր ստացել։

«Սևակի պարգևատրման հիմնական հիմքը եղել է Սևակի հայրենասեր լինելը», -այսօր Արևիկ այցելած լրագրողներին ասաց Սևակի հրամանատար, փոխգնդապետ Զավեն Հունանյանը։ Սակայն ապրիլից հետո, սեպտեմբերի 25-ին Սևակ Խաչատրյանը մահացավ հակառակորդի կրակոցներից։

Սևակի հայրը՝ Հովհաննես Խաչատրյանն ասում է, որ դեպքի օրը Սևակը եղել է դիրքի ավագի օգնականը, այցելել է տարբեր դիրքեր՝ ստուգելու՝ ի՞նչ խնդիրներ կան։ Հանկարծ նկատել է հակառակորդի կողմից տարօրինակ շարժ ու սկսել է ուշադիր հետևել: Բայց թշնամու դիպուկահարի գնդակը ընդհատել է Սևակի կյանքը։

Այսուհետև Արևիկ գյուղի դպրոցի ինֆորմատիկայի դասարանը կկոչվի Սևակի անունով։ Դպրոցի տնօերն Լևոն Այվազյանը բացառիկ մարդ է համարում Սևակին.

«Չեմ կարողանում հայերենի բառարանում գտնել բառ՝ էլ ավելի լավ նրան բնութագրելու համար: Նա այնպիսի ունակություններ ուներ, որ ուսուցչական կոլեկտիվը բացարձակապես կասկած չուներ, որ նա բարձր մակարդակով կծառայեր և կպայքարեր հանուն հայրենիքի ազատագրման: Մեզ համար դա անակնկալ չէր, մենք գիտեինք՝ նա այդպիսին է»:

Դպրոցից հետո Սևակն ուսումը սկսել է շարունակել ԵՊՀ-ի ինֆորմատիկայի և կիրառական մաթեմատիկայի ֆակուլտետում։ Սակայն մի պահի որոշում է չշարունակել ուսումը, դիմում է զինկոմիսարիատ ու գնում ծառայության։

Մայրը հուզված է, արցունքն աչքերին ասում է՝ Սևակը սիրում էր իր ծննդյան օրերը. «Սիրում էր ավելի շատ ընկերների հետ անցկացնել: Հիմա էլ ինքը շատ ուրախ է, որ այսքան մարդ իր ծննդյան օրն է նշում: Ես, որպես մայր, կասեի՝ այսքանը տեսնելով, ես հասկացա, որ իմ որդին չի զոհվել, իմ որդին հերոսացել է ու շատ-շատերի համար օրինակ է ծառայում: Ափսոս, ուղղակի մեզ հետ չի»:

«Սևակը մեր լավ զինվորներից մեկն էր, որ ամբողջ զորամասը հպարտանում էր նրանով: Զորամասի ողջ հրամանատարական կազմը չկարողացավ ներկա լիներ, բայց բոլորի անունից շնորհակալություն ենք հայտնում, հպարտանում ենք Սևակով: Ուզում ենք, որ Սևակի ծնողները իմանան՝ իրոք, արժանի զավակ էր: Սևակն ուրիշ կերպար էր: Նա միշտ մեր հետ է: Ինչ էլ ասենք՝ Սևակի համար քիչ է, նա լավ զինվոր էր հայրենիքի համար:

Բազմիցս խրախուսվել է զորամասում, միշտ աչքի է ընկել: Մեզ համար դժվար էր սեպտեմբերի 25-ին: Երբ իմացանք, որ զոհվել է, չգիտեինք ինչ է կատարվում, անսովոր ցավ էր բոլորիս համար», - Հադրութի զորամասում Սևւակ Խաչատրյանի հետ ծառայած կապիտան Գևորգ Պողոսյանի խոսքերն են։