Ձեր վստահելի աղբյուրը

Հայաստանի դահուկային ֆեդերացիայի փոխնախագահ Գագիկ Սարգսյանն այսօր լրագրողների հետ հանդիպման ժամանակ իր գոհունակությունը հայտնեց Հայաստանի առաջատար դահուկորդ Սերգեյ Միքայելյանի մրցելույթների առիթով, ով օրերս Ալմաթիում կայացած ձմեռային ուսանողական համաշխարհային խաղերի ժամանակ աննախադեպ հաջողություն էր գրանցել` նվաճելով բրոնզե մեդալ:

«Առաջին անգամ էինք մասնակցում ձմեռային ուսանողական համաշխարհային խաղերին: Մեր առաջատար Սերգեյ Միքայելյանը բոլորիս ուրախացրեց: Այս հաջողությունը պետք է ուղղակի հիմք ընդունել և միջազգային խոշոր մրցաշարերում ավելի մեծ արդյունքներ գրանցել: Սերգեյի համար տարին ևս հագեցած է: Փետրվարի 17-19-ը նա, մրցաշրջանի ընթացքում արդեն 3-րդ անգամ, կմասնակցի Էստոնիայում կայանալիք աշխարհի գավաթի խաղարկության փուլին,  որից անմիջապես հետո կմեկնի աշխարհի առաջնության մրցավայր»,- տեղեկացրեց փոխնախագահը:

Հայաստանում ձմեռային մարզաձևերի զարգացման համար կան նախապայմաններ, բայց չկան հաջողություններ: Սա այն դեպքում, երբ նախկինում մարզաձևերի նկատմամբ հետաքրքրությունը մեծ էր ու լայնամասշտաբ: Ինչո՞ւմն է կայանում խնդիրը և ի՞նչն է խանգարում հայ մարզիկներին, այսպես մեկնաբանեց Գագիկ Սարգսյանը.

«Մեր հասարակությունը նոր չի սկսում հասկանալ կամ սովորել դահուկային մարզաձևը: Ես ինքս դահուկորդ եմ եղել և մեր գյուղում, որն այնքան էլ այս մարզաձևի առումով առաջատարներից չէր, դպրոցում սովորեցնում էին դահուկ մարզաձևը: Գրեթե բոլոր դպրոցներն ապահոված էին գույքով: Տարին 2 անգամ անցկացվում էր խոշոր մրցաշար և բոլոր մարզադպրոցները մասնակցում էին: Ցավոք, Խորհրդային Միության փլուզումից հետո խնդիրներ առաջ եկան, բայց վերջին տարիներին մեծ աշխատանք է տարվում` մարզաձևը կրկին զարգացնելու և մասսայականացնելու համար: Առաջին խնդիրը գույքն է: Ցավոք, այն մաշվում է և բավարար չէ: 2017/18 թթ. մրցաշրջանի համար ունենք պայմանավորվածություն Նորվեգայի մեր գործընկեր ֆեդերացիայի հետ, և նրանք կօգնեն մեզ գույքով և հանդերձանքով, որոնք բավական թանկ արժեն: Մենք փորձում ենք և կփորձենք հավատարիմ մնալ հին ավանդույթներին»:

Panorama.am-ի այն հարցին, թե Կորեայում 2018 թ. կայանալիք Օլիմպիական խաղերին մասնակցելու համար ունե՞նք արդյոք ուղեգիր և ո՞ր մրցաշարերն ու ո՞ր հորիզոնականներն են վարկանիշ ապահովում, Հայաստանի դահուկային ֆեդերացիայի փոխնախագահը բացատրեց, որ այստեղ համակարգը մի փոքր այլ է և բարդ:

«Ուղեգիր կոչվածը մեր մարզաձևերում կոչվում է քվոտա: Տարին բաժանված է ժամանակահատվածների և կան վարկանշային աղյուսակներ: Վերջին աղյուսակը կհրապարակվի 2018 թ. հունվարի 20-ին: Հենց այդ ժամանակ վերջնական կորոշվի, թե որ երկիրը որքան քվոտա կունենա: Կախված է այն հանգամանքից, թե երկրի լավագույն ներկայացուցիչներն ինչպիսի արդյունքներ կգրանցեն: Մեր ֆեդերացիան, մեր մարզիկները զբաղեցնում են միջին հորիզոնականներ:

Սոչիի օլիմպիադայից սկսած հաղթահարել ենք այն փուլը, որ մեզ ուղղակի տալիս էին մասնակցության քարտեր: Բայց այնպես էլ չէ, որ ունենք ընդգծված առաջատարներ` աշխարհի մասշտաբով, ովքեր միանգամից ապահովում են իրենց տեղը: Դրան զուգահեռ ունենք առաջատար` Սերգեյ Միքայելյանը, որի զբաղեցրած հորիզանականն ու նրա ցույց տված արդյունքները հնարավոություն են տալիս ևս մեկ քվոտա ունենալու: Ամեն ինչ կախված է նաև մրցակիցներիդ մրցելույթներից: Եթե ունենանք մարզիկ, ով աշխարհի 300 լավագույնների շարքում կլինի, հնարավորություն կունենանք ևս մեկ քվոտա վաստակել»,- ասաց Սարգսյանն ու ավելացրեց, որ ամեն ինչ դեռ առջևում է և իրենք ձգտելու են գոնե պահպանել Սոչիի քվոտաների տեղը:

Փոխնախագահը նաև անդրադարձավ ձմեռային մարզաձևերի անկանխատեսելիությանն ու մասնավորապես նշեց, որ լինում են դեպքեր, երբ միայն մարզիկի պատրաստվածությունը բավարար չի լինում հաղթելու համար: Կարող է խանգարել անգամ եղանակը` նպաստելով մի մարզիկի հաջողությանը, միևնույն ժամանակ` վնասելով մյուսին:

«2015 թ. նոյեմբերին Սերգեյ Միքայելյանը Ֆինլանդիայում մասնակցեց Սկանդինավիայի գավաթի խաղարկությանը և առաջ անցավ այնպիսի աշխարհահռչակ մարզիկից, ինչպիսին Դարիո Կալոնիան է, բայց արդեն աշխարհի գավաթի խաղարկության ժամանակ Կալոնիան 3-րդն էր, իսկ մեր մարզիկը 50-րդը: Կամ 2007 թ. Ճապոնիայում կայացած աշխարհի առաջնության ժամանակ եղանակը փոխվեց 4 անգամ: Բելառուս մարզիկը մեկնարկեց սկզբում, բախտը բերեց և նա բարենպաստ պայմաններում սահեց ու դարձավ չեմպիոն, մյուսները մեծ դժվարությամբ հատեցին եզրագիծը` հալված ձյան պատճառով: Այդպիսի դեպքեր շատ կան: Մարզաձևն անկանխատեսելի է և չես կարող ասել, թե ինչ կլինի»,- շեշտեց փոխնախագահը:

Վերջում Գագիկ Սարգսյանը հավելեց, որ ներկայիս սերնդին արժանի փոխարինողներ կան, ովքեր կարող են բարձր նվաճումներ ունենալ: Մարտի սկզբին տեղի կունենա Հայաստանի երիտասարդների և պատանիների առաջնությունը, որից հետո կներկայացվի, թե նույն մարզիկներն ինչպիսի աճ են գրանցել վերջին մեկ տարվա ընթացքում: