Ձեր վստահելի աղբյուրը

Հավի մսից պատրաստված շաուրմայից թունավորվածներից վեցը շարունակում են բուժում ստանալ Սպիտակի բժշկական կենտրոնում: Այս մասին Panorama.am-ին հայտնեց ԲԿ տնօրեն Արսեն Մկրտչյանը:

«Բոլորի վիճակը գնահատվում է բավարար»,-ասաց նա:

Եթե օրվա ընթացքում հիվանդների մոտ դրական դինամիկա լինի, Ա. Մկրտչյանը չբացառեց, որ դուրսգրումներ կլինեն: Երեկ հիվանդանոցից առողջացումով դուրս է գրվել երկու տուժած: Շտապ օգնության ծառայության միջոցով բժշկական կենտրոն թունավորման նշաներով՝ շոկային վիճակով, սրտխառնոցով, փսխումով  տեղափոխվել էր 12 մարդ:

«Նրանց բոլորի վիճակը ծանր էր կամ միջին ծանրության»,-ասաց ԲԿ տնօրենը:

Տուժածները Լեռնանց գյուղում ապրող մի քանի ընտանիքների անդամներ են: Նրանց թվում եղել է երեկու երեխա: Ծանր վիճակով նրանց մայրիկի հետ տեղափոխվել են Վանաձորի ԲԿ:

Առողջապահության նախարարությունից հայտնել էին, որ Լոռու մարզի Սպիտակի բժշկական կենտրոն և Վանաձորի ինֆեկցիոն հիվանդանոց էր դիմել տարածաշրջանի 12 բնակիչ`   «սննդային տոքսիկոինֆեկցիա» ախտորոշմամբ։  հիվանդները կերել են Լոռու մարզի հանրային սննդի միևնույն կազմակերպության պատրաստված  հավի մսով շաուրմա: Լաբորատոր հետազոտությունների նախնական արդյունքներով` հիվանդներից 11-ի, ինչպես նաև սնունդը պատրաստող կազմակերպության 2 աշխատակցի մոտ հայտնաբերվել է ոսկեգույն ստաֆիլակոկ:

Լեռնանցքի բնակիչները շարուման գնել էին «ԱՐԹՎԱՐԴ» ՍՊԸ-ին պատկանող  «Թեժ կրակ» սննդի օբյեկտից: ՍԱՊԾ-ից երեկ հայտնեցին, որ  տնտեսավորող սուբյեկտի գործունեությունը դադարեցված է: