Ձեր վստահելի աղբյուրը

«Մշտապես արձանագրում ենք, որ կայացած ժողովրդավարություններում, պետականության ամուր հիմքեր ունեցող երկրներում  ինստիտուցիոնալ ստեղծված հնարավորություններն ու գործընթացը շատ ավելի դեր ունեն, քան անհատի, անձի ով լինելը»,- լրագրողների հետ հանդիպմանն ասաց ՀՀ ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանը՝ պատասխանելով ԱՄՆ նախագահ Դոնալդ Թրամփի կողմից վարվելիք արտաքին քաղաքականության վերաբերյալ հարցին:

Նա միաժամանակ նշեց, որ չպետք է թերագնահատել ԱՄՆ նախագահի գործոնը, քանի որ ընդհանուր համակարգային դաշտից ունի էական շեղումներ: Կ. Բեքարյանի խոսքով, ԱՄՆ արտաքին քաղաքականությունը որոշակի երկրաշարժերի, թեկուզ փոքրիկ, կենթարկվի:

«Մեր տարածաշրջանում էական նշանակություն է ունենալու այն, թե ինչ վեկտոր է սպասվում ռուս-ամերիկյան,  թուրք-ամերիկյան հարաբերություններին, սրան գումարած Թրամփի իշխանության գալով բավականին անոմալ վիճակը ԱՄՆ-Իրան հարաբերություններում: Այսինքն, ԱՄՆ քաղաքականությունն անմիջականորեն մեր տարածաշրջանում ավելի կապված է լինելու ոչ թե փոքր երկրների, կամ անգամ ղարաբաղյան հակամարտության հետ, այլ հարակից ավելի մեծ երկրների հետ ածանցված քաղաքականության է լինելու: Այս առումով կանխատեսում անելը դեռևս բավականին բարդ է»,- ասաց Կ. Բեքարյանը: