Թուրքիան բավականին մեծ փնտրտուքի մեջ է. «Եվրոպական Ինտեգրացիա» ՀԿ նախագահ
«Թուրքիայում վերջին զարգացումները, իրադարձությունները բավական ակտիվ են, իրականում մենք ականատես ենք էական գործընթացների փոփոխման, սցենարային նոր բաշխման»,- լրագրողների հետ հանդիպմանն ասաց ՀՀ ԱԺ պատգամավոր, «Եվրոպական Ինտեգրացիա» ՀԿ նախագահ Կարեն Բեքարյանը:
Խոսելով Թուրքիա-ԱՄՆ հարաբերությունների մասին, նա նախ նշեց, թե ինչպես է այն ձևակերպել հենց Թուրքիայի նախագահ Էրդողանը՝ ԱՄՆ-ի հետ հարաբերությունները չի կարելի անվանել անամպ, ՆԱՏՕ-ի գործընկերների հետ հարաբերությունները չի կարելի համարել համերաշխային:
«Էրդողանն ակնկալում է հնարավորինս շուտ հանդիպել ԱՄՆ նախագահ Թրամփի հետ և խոսել օրակարգային հարցերի վերաբերյալ, այսինքն փորձելու է այդ հանդիպմամբ ինչ-ինչ խնդիրներ լուծել»,- ասաց նա:
Թուրքիա-ԵՄ հարաբերություններում Կ. Բեքարյանը նույնպես տեսնում է խնդիրներ՝ ինչպես գլոբալ մակարդակով, այնպես էլ լոկալ. «Գլոբալ մակարդակով խնդիրներից է այն, որ անկախ բանակցություններից, համաձայնագրից, չեն կարողանում միգրանտներին առնչվող հարցերի հետ կապված ստանալ այն լուծումը, որն ակնկալում են երկու կողմն էլ միաժամանակ»:
Թուրքիայի սահմանադրական փոփոխության նախագիծը, սպասվող հանրաքվեն, նրա խոսքով, նույնպես ԵՄ հետ ունեցած խնդիրների շարքում է:
«Շատ գործիչներ, երկրներ այդ նախագիծը դիտարկում են ժողովրդավարությունից նահանջ: Հարցը չի կայանում միայն նրա մեջ, որ խորհրդարանական համակարգից անցում են կատարում նախագահական, այլ գործող նախագահն իր ներքո նոր սահմանադրության է գնում իր իսկ լիազորությունները մեծացնելու համար: Այսինքն, խնդիրը միայն համակարգի մեջ չէ, այլ առաջին հերթին Էրդողանի հանդեպ ունեցած վստահության կամ դրա բացակայության մեջ է»,- նշեց «Եվրոպական Ինտեգրացիա» ՀԿ նախագահը:
Ռուս-թուրքական հարաբերությունների առնչությամբ բանախոսը նախ հիշեցրեց, որ ՌԴ խորհրդարանական երկու մարմնում վավերացվել է թուրքական հոսքի համաձայնագրի նախագիծը, ապա հավելեց. «Կարելի է համարել առաջընթաց, ցույց է տալիս համագործակցության դաշտի լայնացման միտումներ»:
Ընդհանուր առմամբ, Կարեն Բեքարյանի գնահատմամբ, արտաքին քաղաքականության առումով Թուրքիան գտնվում է բավականին մեծ փնտրտուքի մեջ:
«Մենք մեր անմիջական հարևանությամբ ականատեսն ենք բավականին էական անկայունության, գործընթացների, որոնց սցենարային հնարավորությունները սահմանափակ չեն, այսինքն այս անկայունությունը նույն սահմանադրական հանրաքվեի, արտաքին վեկտորների ներքո կարող է էապես զարգանալ: Այսինքն մենք պետք է հետևողական լինենք՝ հաշվի առնելով անմիջական մեր հարևանությամբ անկայունության օջախների լայնացումը, հնարավոր մեծացումը, հաշվի առնելով նաև ուղղակիորեն հայ-թուրքական հարաբերությունների բացակայությունը»,- ասաց նա:
Մանրամասները՝ տեսանյութում:
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
