Ձեր վստահելի աղբյուրը

«Որևէ  մեկն ապահովագրված չէ այս հիվանդությունից,  ուստի քաղցկեղի դեմ պայքարելու և այն հաղթահարելու միակ միջոցը հիվանդության կանխարգելումն է»,- այս մասին այսօր քաղցկեղի դեմ պայքարի օրվա կապակցությամբ հրավիրված ասուլիսում ասաց Հայ-ամերիկյան առողջության կենտրոնի գործադիր տնօրեն Խաչանուշ Հակոբյանը:

Ըստ նրա՝ վերջին տարիներին կանայք սկսել են ավելի շատ հետազոտվել:

«Տարեցտարի մեր կենտրոն ավելի շատ կանայք են գալիս: Կանանց կեսը գալիս է կանխարգելման նպատակով, մյուս կեսն այն ժամանակ, երբ դանակն արդեն ոսկորին է հասել»,- նշեց  նա: 

Խաչանուշ Հակոբյանը հայտնեց, որ Հայաստանում կանանց մոտ առավել տարածված է կրծքագեղձի քաղցկեղը, սակայն վերջին տարիներին շատացել են վահանաձև քաղցկեղի դեպքերը ինչպես կանանց, այնպես էլ տղամարդկանց մոտ:

2016 թվականին Հայ-ամերիկյան առողջության կենտրոնն ունեցել է 40 հազար 615 այցելու, կատարվել է 48 հազար 780  հետազոտություն, որից 17 հազար 208-ը՝ կրծքագեղձի հետ կապված: Հետազոտվող  819 կնոջ մոտ ախտորոշվել է կրծքագեղձի քաղցկեղ:  «Հետազոտված 152 տղամարդկանցից  4-ի մոտ հայտնաբերվել է կրծքագեղձի քաղցկեղ»,- ասաց Խաչանուշ Հակոբյանը:

Նա նաև տեղեկացրեց, որ նախորդ տարի կենտրոնում վահանաձև գեղձի շուրջ 2000 հետազոտություն է կատարվել, որի արդյունքում գրանցվել է  քաղցկեղի 105 դեպք: Նշվեց նաև, որ կատարվել է  600 բարակ ասեղային ասպիրացիա:

«2015թ-ին կենտրոնում գրանցվել է վահանաձև քաղցկեղի 32 դեպք, իսկ 2016թ-ին՝ 105: Սա արդեն անհանգստացնող թիվ է, ուստի տարին մեկ անգամ պետք է հետազոտել նաև վահանաձև գեղձը»,- ասաց կենտրոնի գործադիր տնօրենը:

Խաչանուշ Հակոբյանը նշեց, որ նախորդ տարի կենտրոնում կատարվել է գինեկոլոգիական մոտ 14 հազար հետազոտություն, 2603՝ ՊԱՊ քսուկի հետազոտություն, որի արդյունքում 12 կնոջ մոտ ախտորոշվել է արգանդի պարանոցի քաղցկեղ, իսկ 15-ի մոտ՝ արգանդի պարանոցի նախաքաղցկեղային վիճակ, ինչպես նաև հայտնաբերվել է ձվարանի և էնդոմետրիումի  4-ական քաղցկեղի դեպք: 

Կենտրոնի ղեկավարի խոսքերով՝ կանայք ավելի հակված են բժշկի գնալու, քան տղամարդիկ: «Եթե տղամարդիկ սկսեն ավելի շատ դիմել բժշկի, մենք ավելի լավ արդյունքներ կգրանցենք»,- ասաց նա՝ հավելելով, որ տարին մեկ անգամ տղամարդիկ պետք է անցեն շագանակագեղձի հետազոտություն:

Խաչանուշ Հակոբյանը նշեց նաև, որ Հայ-ամերիկյան առողջության կենտրոնի  20 տարվա գործունության ընթացքում 7000 կնոջ կյանք է փրկվել: